RFEF Ispaniya Superkubogiga talab kamligini hisobga olib, masalani o'zgacha hal qildi: Turnir Saudiya Arabistonida o'tishi rasman tasdiqlandi.
- Yozda Ispaniyada Qirol Kubogi sohibi hamda liga chempioni o'rtasida o'tkaziladigan ananaviy bahs bo'lmadi ("Barselona" - "Espanol"), buning o'rniga Superkubok yanvarning birinchi yarmida, "To'rt jamoa finali" formatida o'tadi: Sovrin egalari safiga yana ikki top-klub - "Real" va "Atletiko"ni qo'shishdi. Natijada o'tgan mavsum CHempionlar ligasida ishtirok etgan 4 jamoa qatnashadigan bo'ldi.
- Eng muhim jihat: Klublar g'olibni Saudiya Arabistonida aniqlashadi. AS malumotlariga ko'ra, federaciya uch yillik shartnoma bo'yicha 120 mln. evro ishlab oladi. Har yili ishtirokchi klublarga 20 mln. evro bo'lib beriladi, yana 20 "limon" federaciya hisobiga tushadi. Ispaniyaliklarda boshqa takliflar ham bor edi (Xitoy, Hindiston va Qatar), RFEF rahbari Luis Rubialesning aytishicha, ushbu kelishuvda pul katta rol o'ynagan. "Taklif yaxshi bo'ldi, aks xolda Superkubok yo'q bo'lib ketardi. To'g'ri, bu pulga bog'liq masala, ammo olingan daromad ayollar va havaskorlar o'rtasidagi futbolni rivojlantirishga yo'naltiriladi. Ha, bizni tanqid qilishmoqda, ammo bundaylarning ko'pchiligi ikkiyuzlamachi" - deya tushuntirish berdi Rubiales.
- Moliyaviy jihat tufayli ko'pchilikda savol paydo bo'ldi. RFEF avvaliga bu pulni teng bo'lishni istamadi va klublar obro'siga qarab taqsimlashga urindi. ASning xabar berishicha, "Valensiya" (va "Atletiko") uchun 3 mln. evro miqdorida gonorar ajratilgan ekan, "Real" va "Barselona" esa 8 mln. evrodan olishadi. "Valensiya" prezidenti bu taqsimlanish adolatsizlik ekanini aytib, klublar tengligi uchun kurashishini malum qildi.
- Superkubok Saudiya Arabistonida o'tkazilishi LaLigadagilarga yoqmagan bo'lishi tabiiy, chunki chempionat prezidenti Xaver Tebas "Barselona" - "Jirona" va "Vilyarreal" - "Atletiko" uchrashuvlarini AQSHda o'tkazmoqchi edi. RFEF rahbari bu adolatsizlik emasligini isbotlashiga to'g'ri keldi: "Superkubok va Mayamida o'ynash - bu turli narsalar, UEFA faqat Superkubokni chetda o'tkazishga ruxsat beradi. Mayamidagi o'yin boshqa jamoalarga va chempionatdagi raqobatga tasir ko'rsatgan bo'lardi" - dedi Luis Rubiales.
- Qarorga qarshi chiqqanlar nafaqat chetda o'tkaziladigan Superkubokni, balki tanlangan joy borasida ham tanqid qilishmoqda: Aytishlaricha, Saudiya Arabistonida inson huquqlari buzilayotgan ekan. Loyiha hamkori hisoblangan sport vazirligi paydo bo'lgan savollarga o'z izohini berdi: Sport vazirligidagilarning aytishicha, Saudiya Arabistoni zamonaviy mamlakatga aylanmoqda va bu davlatga turist vizasini olish oson va ayollar muammosiz stadionga kirishlari mumkin (bunga 2 yil bo'ldi). Aytgancha, ispanlar Superkubokni Saudiya Arabistoniga ko'chirgan birinchi federaciya emas: 2019 yilning yanvarida "Yuventus" - "Milan" o'rtasida Superkubok uchun bahs bo'lib o'tdi. "Yuve" joriy yilning 22 dekabrida ushbu sovrinni himoya qilishiga to'g'ri keladi.
Ispan klublari yanvarning boshida mini-turnir o'tkaza oladi, chunki chempionatdagi so'nggi tur 22 dekabr kuni o'tkaziladi, keyin 2 haftalik tanaffus. 4-5 yanvardagi tur bahslari kechroqqa qoldirilgan, chunki Superkubok tufayli 18 yanvargacha tatil beriladi. Demak, "to'rtlar finali" ishtirokchilari bir oyda ko'pi bilan 5ta uchrashuv o'tkazishadi. "Yangi turnir taqvim bo'yicha muammolar yuzaga keltirmaydi" - deyiladi federaciya xabarida.
"To'rtlar finali"ning taqvimi malum:
8 yanvar. "Real" - "Valensiya"
9 yanvar. "Barselona" - "Atletiko"
12 yanvar. Final
O'yinlar Jiddadagi 62 ming muxlis sig'adigan shahzoda Abdulla Al-Faysal stadionida bo'lib o'tadi.
Bosh sahifaga
217