"Nasaf"da muhim o'yin oldidan jiddiy yo'qotishlar mavjud

"Nasaf" jamoasi o'z safiga chernogoriyalik himoyachi Deyan Bolevichni qo'shib olganidan xabaringiz bor. Ushbu himoyachi 16 fevral kuni tibbiy ko'rikdan muvaffaqiyatli o'tgandi va tomonlar shundan so'ng rasman shartnoma imzolashgan. "Nasaf" jamoasi rasmiy sayti bergan malumotga ko'ra, chap qanot himoyachisi Deyan Bolevich OCHL zayavkasidan o'rin olmagan. Malum bo'lishicha, "Nasaf" klubi legioner himoyachini OCHL zayavkasidan o'tkazishga ulgurmay qolgan.

Malumot o'rnida: OCHLga zayavka qilish muddati 17 fevral kech soat 21:00ga qadar davom etgan. (Deyan Bolevich esa 16 fevral kuni "ajdarlar" bilan shartnoma imzolagani aytilgandi).

"Nasaf" jamoasi rasmiy sayti bergan xabarga ko'ra, "Al Ahli" bilan bo'ladigan o'yinga ketgan futbolchilar ro'yxatidan chap qanot himoyachisi Saydullo Rahmatov o'rin olmagan. Malum bo'lishicha, futbolchining vizasi hal etilmagani bois Saydullo Rahmatov Jiddaga uchib ketolmagan.

Demak "Nasaf" jamoasining ikkita chap qanot himoyachisi o'z-o'zidan "Al Ahli" bilan bo'ladigan bahsda ishtirok eta olishmaydi. Deyan Bolevich esa kamida guruh bosqichi yakuniga qadar OCHLda "ajdarlar"ga ko'maklasha olmaydi.

"Nasaf"ning chap qanot himoyasida va chap qanot yarim himoyasida harakat qiladigan Farruh Sayfiev esa hali jarohatidan forig' bo'lmagan va futbolchi hozirda jamoa bilan birga emas.

Ro'ziqul Berdiev qo'l ostida ayni paytda chap qanot himoyasida o'ynay oladigan futbolchi yo'q. O'tgan yilgi OCHL musobaqasining guruh bosqichi so'nggi turida "Nasaf"ning aynan "Al Ahli"ga qarshi Qarshida uchrashuvida Bahrom Abduraximov qizil kartochka olgani sabab maydonni tark etgandi. Endilikda futbolchi bu yilgi OCHL 1-tur o'yinini ham o'tkazib yuborishga majbur. Superkubok o'yinida Ro'ziqul Berdiev chap qanot yarim himoya chizig'ini aynan shu futbolchi orqali berkita olgan edi.

Demak "Nasaf" jamoasi "Al Ahli" bilan bo'ladigan muhim o'yin oldidan juda jiddiy yo'qotishlarga ega.

Katta ehtimol bilan chap qanot himoyachi sifatida Maqsud Karimov, markaziy himoyada esa SHerzod Azamovga Ildar Mamatkazin ko'maklashishi mumkin. CHap qanot yarim himoyasida esa Aziz G'aniev yoki Ilhom SHomurodov harakatlanishi ehtimoli yuqori.