Saytimiz muxbiri ushbu murabbiy bilan bog'lanib, intervyu tashkil etdi. Quyida intervyuning to'liq matni bilan tanishing.
- Sizni Qirg'iziston chempionatida faoliyat olib borayotganingiz haqida eshitdik, bu to'g'rimi?
- Ha to'g'ri. Men avgust oyida Qirg'iziston chempionatida ishtirok etuvchi "Lider" jamoasiga ko'chib o'tdim.
- Aytingchi, "Lokomotiv-BFK" jamoasidan ketishingizga nima sabab bo'ldi?
- "Lider" jamoasi rahbariyati mening xizmatlarimga qiziqish bildirishdi. Yaxshi shartnoma taklif qilishdi. SHartnoma shartlari menga maqul keldi va bu jamoa bilan bitim tuzdim. Bilasizmi, menda Qirg'iziston chempionatidan ikkita taklif bor edi. "Lider" jamoasi rahbariyati menga ishlash uchun yaxshi sharoit va imkoniyatlarni yaratib berishga vada qilishgani bois, yakunda bu jamoani tanladim.
- "Lider" jamoasi haqida aytib bersangiz...
- Qirg'iziston chempionati ishtirokchisi "Lider" jamoasi hali yosh va endi shakllanayotgan futbol klubi. Joriy mavsum jamoa uchun tajriba yili bo'ldi. Dastlab jamoaga Rossiyadan murabbiy taklif qilingandi, biroq u murabbiy jamoada ishlab keta olmadi. SHundan so'ng ular o'zbekistonlik murabbiy bilan ishlashga qaror qilishdi. Sababi bu ikki xalq o'rtasidagi mentalitet bir-biriga yaqin, shuningdek jamoa rahbariyati avvaldan mening xizmatlarimga qiziqish bildirayotgan edilar. Jamoani shakllantirishda menga o'zbekistonlik futbolchilar Iskandar Mo'minov va Arslon Sultonovlar katta yordam berishdi. Rahbariyat tomonidan kelasi mavsumda kamida kubok yarim finaligacha etib borish, chempionatda kuchli uchlikka kirish vazifasi qo'yildi.
- Bu jamoa bilan qancha muddatli shartnoma imzoladingiz?
- "Lider" jamoasi bilan ikki yilga mo'ljallangan shartnoma imzoladim. Ushbu shartnoma shartlari men uchun maqul keldi.
- Sobiq jamoangiz "Lokomotiv-BFK" haqida fikrlaringiz...
- "Lokomotiv-BFK" jamoasidan iliq xotiralar qolgan. Menga yuqori o'rinlar uchun kurasha oladigan jamoa bilan ishlash imkoniyatini taqdim etgani uchun Muslim Pirmuxammedovga minnatdorchilik bildirgan bo'lardim. Jamoa yigitlari bizning boshlagan ishimizni muvaffaqiyatli tarzda oxiriga etkaza olganliklari uchun judayam xursandman. Ular mening mehnatlarimni zoe ketkazishmadi, o'z guruhlarida 2-o'rinni o'rinni qo'lga kiritishdi.
Bilasizmi, Qirg'iziston chempionatida o'zbekistonlik murabbiyning faoliyat olib borishi - bu Markaziy Osiyo murabbiylariga beriladigan baho hisoblanadi. Meni qo'llab-quvvatlayotganliklari uchun Qirg'iziston futbol federaciyasiga tashakkur izhor qilaman. Jamoamiz yigitlariga ham katta rahmat!
Bekzod Tolibov suhbatlashdi.
Bosh sahifaga
325