Vadim Abramov: "Biz ham Braziliya, Paragvay bilan o'ynashni istaymiz"

"Barchani g'alaba bilan tabriklayman. Menimcha o'yin sizlarga zavq bag'ishladi deb o'ylayman. Yigitlar 5 kun oldingi mag'lubiyatdan chiqib keta olishganidan xursandman. O'yinni nazorat qildik", - deydi Vadim Abramov.

- 75-daqiqadan keyin futbolchilarga nima bo'lmoqda?
- Gap shundaki to'pni nazorat qilishimiz kerak. Ammo futbolchilar nazorat deganda raqib maydonida bo'lishini tushunishmadi. Moskva ham tezda qurilmagan. Buning ustida ishlaymiz.

- Oleg Zoteev va Odil Ahmedov haqida qanday fikrdasiz? Ahmedovni yana himoyada qamaymizmi?
- Ikkalasi ham yaxshi o'ynadi. Agar himoyada yaxshi o'ynayversa Ahmedov himoyada o'ynaydi.

- To'g'ri bugun yutdik ammo negadir maydon markazida to'p uzatishda ko'p xato qildik...
- To'g'ri aytdingiz. Albatta kamchiliklar bo'ldi. Yigitlar hisobdan kelib chiqib o'ynashdi.

- Bir vaqtlar siz safarda Yaponiyani yutgansiz. Albatta hali ancha vaqt bor, Saudiya Arabistonini safarda yuta olamizmi?
- O'shanda men 1,5 yil ishlab qo'ygandim. Bu davr ichida barchasi o'zgarishi mumkin. Terma jamoa azolari klublardan kelishadi, o'sha o'yinga yaqin futbolchilar qanday formada bo'lishini ko'rish kerak. To'g'ri u erda issiq bo'ladi, ammo Saudiya Arabistoni terma jamoasi azolari ham "protivogaz" bilan o'ynashmasa kerak.

- Terma jamoa katta tanaffusga chiqmoqda. Keyingi rejalar qanday?
- Mart oyida menimcha Qozog'iston bilan o'rtoqlik o'yini o'tkazish borasida kelishuvga erishganmiz. SHu o'rinda Janubiy Koreya Braziliya bilan, Saudiya Arabistoni Paragvay bilan o'ynamoqda. Biz ham shunday darajadagi jamoalarga qarshi o'ynashni istardik. Qishda futbolchilarni yig'inma yig'in olib yurishni istamaymiz. Bundan tashqari "Paxtakor" va ikki klubimiz OCHLda ishtirok etadi.