Bu inson haqida uzoq gapirish mumkin. Akmal SHorahmedov, Vitaliy Denisov, Sanjar Tursunov, Farhod Tojiev, Marat Bikmaev kabi futbolchilarni o'z vaqtida kashf etib, tarbiyalab o'zbek futboliga etkazib berganining o'ziyoq Dilshod Nuralievning qanday toifadagi murabbiy ekanligidan dalolat berib turibdi.
SHuningdek, Dilshod Jo'raalievich O'zbekiston U-16 terma jamoasi bilan birga Osiyo chempioni bo'lgan. Bunga qadar hech bir terma jamoamizga Osiyo chempioni bo'lish baxti nasib etmagandi. Eronning Taxti shahri mezbonlik qilgan qita chempionati Nuraliev jamoasining triumfi bilan yakunlangan edi.
Yuqorida aytganimizdek, Dilshod Nuraliev haqida ko'p va xo'p gapirish, u kishiga tesha tegmagan tariflarni berish mumkin. Fursatdan foydalanib, barcha o'zbekistonlik futbol muxlislari, saytimiz o'quvchilari hamda ijodkorlari, shogirdlari nomidan Dilshod Nuralievga sog'lik-salomatlik, oilaviy baxt, omad tilab qolamiz. Tug'ilgan kuningiz muborak bo'lsin, Dilshod Jo'raalievich!
Nodirxo'ja Yuldashev, “Odil Junior” jamoasi boshqaruvchisi
“Dilshod Nuraliev deganda birinchi galda ko'z oldimizga bolalar murabbiyi keladi. Menimcha, u kishiga aynan shu mavzuda ortiqcha tarif shart emas. SHu sababdan ham Odil Ahmedov bilan birga “Odil Junior” jamoasini ochganimizda, birinchilardan bo'lib Dilshod aka murabbiy sifatida ishga taklif qildik. Ularga 2009 yilgi tarkibni ishonib topshirdik. Nega aynan 2009 yilgi jamoa? Sababi, bu yoshdagi futbolchilar yaqin kelajakda olimpiya terma jamoasini tashkil etib berishadi. Eng ishongan guruhimiz hamda olimpiya yoshidagi jamoamiz bo'lgani uchun ham Nuralievga ishonch bildirildi. Fidoiylikni qarangki, o'z tug'ilgan kunida ham bolalar bilan birga. Bugun Dilshod aka bilan birga Namangandamiz. Bu erga shuningdek, italiyalik hamkor-murabbiymiz ham kelgan. Turnir bahona bolalarni ko'rikdan o'tkazyapmiz. Nuraliev italiyalik tajribali mutaxassisdan o'rganganlarini mashg'ulotlarda yosh futbolchilarimizga singdirishni boshlab yubordi. SHu fursatdan foydalanib, “Odil Junior” jamoasining mamlakatimizdagi barcha murabbiylari nomidan Dilshod Nuralievni qutlug' yosh bilan muborakbod etaman. Umringiz ziyoda bo'lsin, MAESTRO!”.
Bosh sahifaga
1368