Superliganing 24-turi doirasidagi "Navbahor"ga qarshi g'alabali o'yindan keyin "Bunyodkor" bosh direktori Jasur Jaloliddinovning transferi bo'yicha eksklyuziv malumotni berdi.
- "Joriy mavsumda yorqin o'yinlari bilan ko'pchilikda iliq taassurot qoldirgan Jasur Jaloliddinov dekabrda Italiyaga yo'l oladi. Italiya B Seriyasi peshqadami bo'lib turgan "Benevento" jamoasi Jaloliddinovga qiziqmoqda. Jasur Jaloliddinovni "Benevento"da ko'rishni shaxsan jamoa bosh murabbiyi Filippo Inzagi istagan. Yaqinda Prezidentimizning futbolga oid farmoni loyihalari elon qilindi. Farmonda ko'plab iqtidorli yosh futbolchilarni tarbiyalab, ularni Evropa bozoriga eksport qilib, shu orqali terma jamoalarimizni kuchaytirish vazifalari kiritilgan. SHu farmon yo'lida biz Jasur Jaloliddinovni transferi uchun katta pul so'ramasdan, Evropaga yo'l ochilgani tufayli "Benevento"ga qo'yib yuboramiz. Italiyaliklarning taklifiga ko'ra, shartnoma hozir imzolanadi va kelasi yili iyul oyidan rasman kuchga kiradi. CHunki Jasur Jaloliddinov hozir 17 yoshda va hali 18 yoshga to'lmagan. Agarda "Benevento" joriy mavsum yakuniga ko'ra o'z maqsadiga erishib, kuchli uchlikda qolsa, unda kelasi mavsumdan etiboran o'zbek futbolchisi yana Italiya A Seriyasida o'ynashi mumkin bo'ladi", - dedi Ulug'bek Mirzaev.
Eslatib o'tamiz, "Benevento" ayni paytda B Seriyada 13-turdan keyin 28 ochko jamg'argan holda turnir peshqadami bo'lib turibdi. B Seriyada dastlabki 3 o'rinni egallagan jamoalar A Seriyaga yo'llanma olishadi.
"Benevento" jamoasi bosh murabbiyi sifatida esa italiyalik mashhur hujumchi Filippo Inzagi ishlamoqda va aynan Pippogolga Jaloliddinovning o'yinlari maqul kelgani tufayli mazkur transfer amalga oshish bo'sag'asida.
Bosh sahifaga
1746