Yakuniga etgan futbol mavsumi "Lokomotiv" uchun birmuncha omadsiz keldi. Yilni O'zbekiston Superkubogini qo'lga kiritish bilan boshlagan "temiryo'lchilar" afsuski, Osiyo chempionlar ligasida guruhdan chiqa olishmadi. "Loko" shuningdek birinchi marta o'tkazilgan Liga Kubogini ham guruh bosqichida tark etdi.
Superligada bu yil ikkinchi bo'lish nasib qildi. Buni qaysidir jihatdan yaxshi natija desa bo'ladi. Ketma-ket uch yil O'zbekiston chempioni bo'lgan "Lokomotiv" bu yil o'z tarixida to'rtinchi marta kumush medallarga ega chiqdi. Malumot uchun, "temiryo'lchilar" 2015, 2014, 2013 yilgi mavsumlarda ham ikkinchi o'rinni egallagandi.
Afsuski, bu yil O'zbekiston Kubogidagi yurish omadsiz chiqdi. Musobaqaga 1/8 finaldan kirishgan jamoamiz birinchi o'yindayoq "Surxon"ga mag'lub bo'lgan holda Kubok bahslarini tark etdi. O'ylaymizki, keyingi yil Kubok uchun kurash boshqacha kechadi.
"Lokomotiv" ushbu mavsum 37ta rasmiy o'yinda maydonga tushdi. Superligada 26 uchrashuv o'tkazgan "temiryo'lchilar" Osiyo chempionlar ligasida 6 marta, Liga Kubogida 3ta hamda O'zbekiston Superkubogi bilan O'zbekiston Kubogida bittadan o'yinda ishtirok etishdi.
"Lokomotiv" jami o'tkazilgan 37 o'yinning 17tasida zafar quchib, 11 bor durang o'ynadi va 9ta bellashuvda mag'lub bo'ldi. Dastlabki 20ta bahs Andrey Fyodorov, mavsumning qolgan 17 o'yini Samvel Babayan murabbiyligida kechdi. "Lokomotiv" Superliga ikkinchi davrasida faqat bitta o'yinda imkoniyatni boy berib, bu borada "Paxtakor" bilan bir xil ko'rsatkich qayd etdi.
"Lokomotiv"ning 2019 yilgi mavsumda o'tkazgan o'yinlari:
O'zbekiston Superkubogi - 1 (g'alaba)
Osiyo chempionlar ligasi - 6 (2 g'alaba, 1 durang, 3 mag'lubiyat)
Coca Cola Superligasi - 26 (13 g'alaba, 10 durang, 3 mag'lubiyat)
O'zbekiston Kubogi - 1 (mag'lubiyat)
O'zbekiston Liga Kubogi - 3 (1 g'alaba, 2 mag'lubiyat)
Bosh sahifaga
305