Unga ko'ra, Olmaliqning AGMK va Toshkentning "Paxtakor" jamoalari hal qiluvchi o'yinda o'zaro kuch sinashishadi. Yarim final o'yinlaridan so'ng olmaliqliklar o'yinchisi Dilshod Rahmatov bilan suhbatlashdik.
"Navbahor"ga nisbatan bizda tajribaliroq futzalchilar ko'proq yig'ilgan, mana shu tajriba qo'l keldi. Qolaversa, murabbiyning ko'rsatmalarini imkon qadar yaxshi bajarganimiz g'alaba omili bo'ldi. Namanganliklar ham yaxshi jamoa shakllantirishgan, ular bungacha "So'g'diyona"ni engib yarim finalga chiqishgandi", - deya gap boshladi Rahmatov.
- Final oldidan fikringiz?
- "Paxtakor" jamoasi "Nasaf"ni tajriba evaziga yutib ketdi deb o'ylayman. "Nasaf" o'yinchilarining zarbalari va driblinglari yaxshi, yigitlar kuchli o'yin ko'rsatishadi. Menimcha, "Paxtakor" azolari futzalni ko'proq o'ynagani sabab g'alabani o'ziniki qilishdi. Vaholanki, poytaxtliklar tarkibida yo'qotishlar bor edi, jarohat sabab bir necha nafar futzalchilari safdan chiqqan. Bundan tashqari, birinchi kungi o'yinda "Paxtakor"ni darvozabon (Akmal Xazratqulov) ham ko'p bor goldan qutqarib qoldi. "Nasaf" o'yinchilari paslar bilan gol urib ketsa bo'ladigan vaziyatlarda ham pas bermay, darvozaga zarbalar beraverishdi. Raqib darvozaboni esa yuqori darajada darvozasini qo'riqladi, darvozabon yarim jamoa ekaniga yana bir bor guvoh bo'ldik.
- AGMK azosi sifatida finalda qaysi jamoa tushishini kutgandingiz?
- Har ikki jamoa ham yaxshi raqib. Masalan, "Nasaf"ga qarshi oxirgi o'yinimizda 4:3 hisobida g'alaba qozongandik. O'sha uchrashuvda juda qiynalgandik. "Nasaf" futzalda nostandart jamoa hisoblanadi.
Finalda "Paxtakor" bilan kurash olib boramiz, ularda ham bizda ham tajribali o'yinchilar etarli. Bunda kim kuchliroq tayyorgarlikka ega bo'lsa, o'sha tomon g'alabani o'ziniki qiladi.
Eslatib o'tamiz, futzal bo'yicha o'zbekiston chempionati final uchrashuvlari 15 dekabr sanasida start oladi. Final tomonlardan birining uchta g'alabasiga qadar davom etadi.
Bundan tashqari, Rahmatovning Osiyo chempionati-2020 qurasi haqidagi fikrlari bilan ham qiziqdik.
- Osiyo chempionati-2020 qurasi va guruhdagi raqiblarimiz haqida fikrlaringiz?
- Sentyabr oyining boshlarida Bahodir aka Ahmedov boshchiliklarida Indoneziyada bo'lib o'tgan xalqaro musobaqada ishtirok etib chempion bo'lgan edik. o'sha musobaqada mezbonlar Indoneziya terma jamoasini 3:1 hisobida mag'lub etgandik. Ularning o'yinchilari shaxsan menda yaxshi taassurot qoldirdi, to'p bilan tez harakat qiladigan futzalchilar. Oldingidan o'sish katta ularda.
Xitoy chempionatida o'ynaganman, u erda do'stlarim bor va hozir ham ular bilan gaplashib turaman. Xitoylik futzalchilarning darajasi biznikilardan pastroq hisoblanadi. Bu katta gapirish emas, bor haqiqat. Bizni yigitlar hozir ulardan kuchli. Bahrayn haqida esa bilmayman. Qita birinchiliklarida ham ularni ko'rmagan ekanman. Bahrayn o'ziga xos syurpriz bo'lishi mumkin. Guruhdagi raqiblardan nisbatan kuchli bo'lsak ham har bir bahsga jiddiy tayyorgarlik ko'ramiz. Sababi, bugungi kunda kim raqibni mensimay maydonga tushsa mag'lub bo'ladi.
- Xitoy chempionatida to'p tepganingiz bois mahalliy o'yinchilarning imkoniyatlarini yaxshi bilasiz. Bu haqda o'quvchilarga ham aytib o'tsangiz.
- Albatta, u erda birga o'ynagan do'stlarim bilan doim gaplashib turamiz. Xitoy terma jamoasi o'tgan Osiyo chempionatidan beri Jahon chempionatiga yo'llanma beradigan mana shu musobaqaga tayyorgarlik ko'rib kelmoqda. Buning uchun ular Italiyadan murabbiylar olib kelishgan. Terma jamoa murabbiylar shtabi to'liq italiyaliklar. Jamoa moliyaviy tomonlama yaxshi taminlangan va asosan Evropa mamlakatlarida o'quv-mashg'ulot yig'inlari o'tkazishmoqda. Qita birinchiligiga tashlangan quradan keyin ham Xitoy terma jamoasi yig'in o'tkazish uchun Xorvatiyaga uchib ketgan. Menimcha, italiyalik murabbiy yaqin yillarda yaxshi jamoa tuza oladi. Hozir ularda ham bizdagi kabi yosh o'yinchilarni ko'proq jalb qilishmoqda.
Oxirgi Osiyo chempionatida xitoyliklar ko'rsatgan o'yinlar hamon esimda. Iroq bilan o'tgan o'yinda 2:0 hisobida oldinga chiqib olishgan va ikkinchi bo'limda to'rtta to'p o'tkazib yuborishgandi.
- Agar Osiyo chempionatida guruhni peshqadam sifatida yakunlay olsak, chorak finalda katta ehtimol bilan Xose Mariya Pazos Mendez boshqarayotgan Tailandga ro'baro kelamiz...
- Avvalo, guruhni birinchi o'rinda yakunlashga harakat qilamiz. Nasib qilib buni uddalay olsak, 1/4 finalda biz ham aynan Tailand tushishini taxmin qilayapmiz. CHunki, Eron kuchliroq. Agar sobiq murabbiyimiz Mendez jamoasi bilan to'qnash keladigan bo'lsak, bunda kimni tayyorgarligi kuchliroq bo'lsa va xohishi ko'proq bo'lsa o'sha jamoa g'alaba qozonadi deb o'ylayman. Tailand bizdan ancha ustun demagan bo'lardim. Bizda ham yaxshi yoshlarimiz bor, bu yil chempionatda o'zini ko'rsatgan bir necha nafar yosh o'yinchilar terma jamoaga chaqirilishmoqda. Taktikalarimiz ham bir xil. Yanvar oyidan boshlanadigan yig'inda yaxshi tayyorgarlik ko'ramiz va xuddi 2016 yil Toshkentda bo'lgani kabi Tailandni mag'lub etamiz deb umid qilaman.
Tolibjon Qosimov suhbatlashdi
Bosh sahifaga
595