Tailanddagi Osiyo chempionatida o'rtaga Olimpiada yo'llanmasi tikilgani bois, bu turnirnining masuliyati o'ta yuqori. Biz bu borada ayrim savollarimiz bilan jamoa yarim himoyachisi Abdulla Abdullaevga murojaat qildik.
- Futbolchilar olimpiya terma jamoa ixtiyoriga turli holatda etib keladilar. Bu jamoaviy o'yinni shakllanishiga to'sqinlik qilmaydimi?
- Futbolchilar o'z klublaridan boshqacha kayfiyatda etib kelsada, bu tayyorgarlik jarayoniga aslo tasir qilmaydi. Terma jamoada maqsad bitta bo'ladi. Bunday paytda klubda bo'lib o'tgan ishlar ikkinchi darajaga tushadi. Bollarda kayfiyat yaxshi. Asosiy tayyorgarlik Dubayda bo'lib o'tadi, unda bir qator jamoalar bilan o'rtoqlik uchrashuvi o'tkazilishi rejalashtirilgan.
- Masalan “Bunyodkor” jamoasi azolari bronza medaliga ega chiqdi. “Paxtakor” chempionlikni qo'lga kiritdi. Qolgan klublar pastki pog'onalarni zabt etdi. Bu ichki muhitga qanday tasir qiladi?
- Bu borada havotirga o'rin yo'q. Barcha futbolchilar ahil-inoq. Undan ham yaqin bo'lib ketganmiz. Barchamiz bitta vatan sharafini himoya qilamiz, bitta jamoani azosi hisoblanamiz. Uchinchi o'rinni oldi, ettinchi o'rinni oldi degan gap yo'q bizda.
- Vadim Abramov sizni joriy yilda markaziy himoyachi sifatida ko'proq maydonga tushirdi. O'zingizni himoyaga mansub o'yinchi deb o'ylaysizmi?
- Har bir murabbiy futbolchini o'ziga maqul kelgan tarafini tanlaydi. Masalan Mirjalol Qosimovga oldingi chiziqdagi harakatlarim yoqqani uchun, hujumchi ortiga qo'yardi. Abramov esa himoyada sinab ko'rdi. Menimcha OTJda tayanch yarim himoyada o'ynasam kerak. Markaziy himoyada yaxshi futbolchilar bor. Murabbiy meni qaysi poziciyaga qo'ysa o'sha joyda harakat qilishga tayyorman.
- Dastlab Dubayda o'quv mashg'ulot yig'ini olib boriladi. So'ng Tailandga yo'l olasizlar. Uzoq muddatli parvoz jamoani jismoniy imkoniyatini pasaytirib yubormaydimi? Avvalari bundan juda ko'p aziyat chekkanmiz...
- SHularni inobatga olgan holda Dubaydan to'g'ridan-to'g'ri Tailandga uchamiz. Ikki joyni iqlimi deyarli bir xil. Deylik havodagi bosim, namlik o'xshash. Barchasi bizning foydamiz uchun qilinmoqda. Muvaffaqiyatli ishtirok etishimiz uchun barcha ish qilindi. Ketishimiz oldidan tashkil etilgan tadbir ham ruhiyatimizga yanada qo'shimcha kuch berdi deb o'ylayman.
Abdulaziz Iskandarov suhbatlashdi
Bosh sahifaga
89
