Eron olimpiya terma jamoasi bosh murabbiyi Hamid Estili jurnalistlarga bergan intervyusida U-23 Osiyo chempionatiga tayyorgarlik ko'ngildagidek ketmayotgani haqida gapirdi.
Malumot uchun, Eron "C" guruhida O'zbekiston, Xitoy va Janubiy Koreyaga qarshi bahs olib boradi. Tailanddagi musobaqa 8-26 yanvar oralig'ida bo'lib o'tadi va kuchli uchlikka kirgan jamoalar Tokio Olimpiadasiga yo'llanma olishadi.
Ushbu musobaqaga tayyorgarlik haqida eronliklar ustozi shunday dedi:
- "SHanba kuni mashg'ulotlarni boshladik, lekin mashg'ulotdan umuman ko'nglim to'lmayapti, chunki barcha futbolchilar safimizga kelib qo'shilgani yo'q. Federaciya bilan og'zaki kelishuvga ko'ra Eron chempionati vaqtincha to'xtatib turilishi lozim edi, lekin unday bo'lmadi. O'yinlar hamon davom etyapti. Buning ustiga "Istiqlol" va "Sepaxon" o'z o'yinchilarini terma jamoaga qo'yib yubormadi".
- "20 dekabr kuni Dohaga uchishimiz kerak, lekin tarkibimiz to'liq emas. O'ylaymanki, Eron futbol federaciyasi vaziyatni to'g'ri tushungan holda tayyorgarlik dasturimizga o'zgartirish kiritadi. Biz juda kuchli guruhdan joy olganmiz. Yaxshi natija ko'rsatish uchun shunga yarasha tayyorgarlik ko'rish kerak. Hozir barcha jamoalar to'liq tarkib bilan shug'ullanyapti, biz esa muammolar girdobidamiz".
Eslatib o'tamiz, U-23 Osiyo chempionati guruh bosqichidan o'rin olgan Eron - O'zbekiston bahsi 9 yanvar kuni bo'lib o'tadi.
Bosh sahifaga
290