OCHL. Birinchi tur taassurotlari

"Lokomotiv" va "Paxtakor" o'z maydonida, "Bunyodkor" safarda durang qayd etgan bo'lsa, "Nasaf" esa 1:2 hisobida yutqazib qo'ydi.

Albatta, dastlabki turda bizdan hech bir klubning g'alaba qozonmagani kishini biroz ranjitishi turgan gap, biroq o'yinlar saviyasidan kelib chiqib aytganda durang ham yomon emas. Masalan, "Lokomotiv" 23 fevral kuni yutqazib qo'yishi ham mumkin edi, hartugul oxirgi daqiqalarda Sardor Mirzaev tomonidan kiritilgan gol "temiryo'lchilar"ni mag'lubiyatdan saqlab qoldi. 

Mana shu o'yin borasida to'xtaladigan bo'lsak, "Al Ittihod" ko'p ham kuchli ko'rinmadi. Ehtimol, mavsumning birinchi rasmiy uchrashuvi bo'lgani uchunmi, "Lokomotiv" o'zidan kutilgan o'yinni namoyish qila olmadi. Darvoza tomon zarbalar kam berildi. Hujumchilar "portlashi" kerak bo'lgan vaziyatlarda go'yoki bemalol yurishdi. Qolaversa, boshqa futbolchilarda ham bir-birini tushunib harakat qilish ko'zga tashlanmadi.

Ertasi kuni o'z maydonida "Paxtakor" "Al Hilol"ga qarshi to'p surdi va bunda ham durang qayd etildi. O'yinda to'rtta gol kiritilgani bilan uchrashuv juda qiziq kechdi deb bo'lmaydi. Ikkala tomon ham o'yinni past saviyada o'tkazdi. "Paxtakor"ni tushunsa bo'ladi, jamoani bir nechta etakchilar tark etdi, qolaversa endi mavsum boshi bo'lgani uchun o'yin sifati yuqori emas. 

Safarda to'p tepgan "Bunyodkor" o'zining mazmunli o'yini bilan yodda qoldi. Yoshlar tezda jamoaga kirishib ketishibdi. Osiyoning eng yaxshi yosh futbolchisi Doston Hamdamovning harakatlari va ikkita goli tahsinga loyiq. Ammo "Bunyodkor"ning butun o'yin davomida kuchni teng taqsimlay olmagani pand berdi. Jamoa bazi vaziyatlarda o'yin suratini tushirib, to'pni o'zida saqlab turishi lozim edi. Lekin "Bunyodkor" biz ham sizlardan kam emasmiz degandek raqibning hujumiga hujum bilan javob berishda davom etaverdi. Bu esa yakunda pand berdi, chunki jamoa tayyor g'alabani qo'ldan chiqardi.

"Nasaf" ham hech bo'lmaganda durangga loyiq edi, lekin yaponiyalik hakamning antiqa qarorlari deb qarshiliklar mag'lub bo'lishdi. Dilshod Rahmatullaevning boshiga ataylab tepgan futbolchiga qarshi hech narsa qila olmagan hakam boshqa bir vaziyatda yo'q joydan Erkin Boydullaevni chetlatdi. Garchi "Nasaf" shu kuni mag'lubiyatga uchragan bo'lsa-da, jamoaning yosh hujumchisi Bobir Abdixoliqov ko'pchilikda iliq taassurot qoldirdi. "Nasaf" futbol maktabi tarbiyalanuvchisi o'zining OCHLdagi ilk o'yinida gol urishga muvaffaq bo'ldi. 

Malumki, hozir Saudiya Arabisitoni chempionatida mavsum qizigandan qizimoqda, bizda esa mana endi-endi boshlanyapti. Mana shu holatdan kelib chiqib aytganda klublarimizning birinchi turdagi ishtirokini salbiy baholay olmaymiz. Agar jamoalarimiz keyingi turlarda o'yindan o'yinga kuchayib borishni eplay olishsa, guruhdan hech bo'lmaganda ikkita jamoaning chiqishiga umid qilsa bo'ladi.

Jasur Aslanov.