Darhaqiqat, iqtidorli yarim himoyachi Superliga 2019 birinchi davrasida “lochinlar” safida katta hajmdagi ishni bajargan edi. Biroq, kutilmaganda og'ir jarohatga yo'liqib, uzoq muddatga safdan chiqqandi.
Bugun biz Abdujamol Isroilov bilan bog'lanib,tiklanish jarayonlari hususida suhbatlashdik.
- Ayni vaqtda to'liq tiklanib ulgurdingizmi? Yangi mavsumda muxlislar yana sizning o'yiningizdan bahramand bo'lishadimi?
- Etibor uchun rahmat. Jarohat futbolning bir qismi ekan. Hozir ancha yaxshiman. Moskvada kichik jarrohlik amaliyotini o'tadim. Nasib qilsa bir oylardan keyin mashg'ulotlarga qo'shilaman. Oldingidan kuchli bo'lib qaytishga harakat qilaman.
- Sizning holatingizdagi aksariyat futbolchilar ruhiy tushkunlikka tushib qoladi. Jarohat olgan paytingizda qalbingizdan qanday kechinmalar o'tdi? Nimalarni o'yladingiz?
- Buni boshdan o'tkazish og'ir bo'larkan. Futbol o'ynashni istaysiz-ku, imkoniyatingiz bo'lmasa. Qiynalgan paytlarim ham bo'ldi. Oila azolarimga rahmat aytaman, doim yonimda bo'lishdi. Klubdagilar dalda bo'lib turishdi. Sen bizga keraksan, hali o'ynashing kerak deyishdi. Muxlislar aslo yolg'iz qoldirishmadi. Ular uchun yanada yaxshiroq to'p tepishga intilaman.
- “Navbahor” bosh murabbiyi Andrey Kanchelskis intervyularini birida sizni top chempionatlarda o'ynab keta oladi degandi. Kuchli chempionatlarda o'ynash orzuingiz bormi?
- To'g'risini aytsam, murabbiyimizning bu gaplaridan xursand bo'ldim. Andrey Antanasovichning etirofi menga yanada qo'shimcha kuch berdi. Top chempionatlarda to'p tepish har bir futbolchining orzusi va maqsadi hisoblanadi.
- Andrey Kanchelskisning qaysi jihati sizni ajablantirdi?
- Avvalo, Kanchelskisning insoniylik xususiyatini etirof etishim kerak. Deylik, o'z davrida ko'pchilik bilgan “Manchester Yunayted” klubida to'p tepgan. Biz - futbolchilar bilan ham, klubdagi oddiy xodimlar va muxlislar bilan ham birdek samimiy muomala qiladi. Bu meni juda hayron qoldirdi. Uning odamgarchiligiga tan berdim.
- Superliga 2019 uchrashuvlari doirasidan o'rin olgan “Paxtakor” va “Navbahor” uchrashuvi yilning eng qiziqarli uchrashuvlaridan biri bo'ldi. Unda siz “SHerlar” darvozasini ishg'ol qilgan edingiz. Nazarimda mana shu o'yin sizni ommaga yanada yaqinroq tanitdi...
- Esingizda bo'lsa 2017 yil Samarqandning “Dinamo” jamoasida o'ynaganman. Ko'pchilik bizni “Lester”ga qiyoslashgandi. Usha paytlarda men va boshqa futbolchilar mahalliy muxlislarga tanilib etiborga tushganmiz. Siz aytgandek “Paxtakor”ga qarshi kechgan 2:2 hisobidagi o'yin meni tanitdi deya olaman.
- Keling suhbatimizni OTJ haqida davom ettirsak. O'z vaqtida siz ham mazkur terma jamoa bilan Osiyo chempiontida g'olib chiqqansiz. Qaysidir manoda o'zingizni hissangizni qo'shgansiz. Tarixni takrorlash bilan birgalikda, yangi tarix yaratish hozirgi olimpiyachilarimizning oldida turgan asosiy maqsadi hisoblanadi. O'tgan galgi turnirga qaraganda, bu safar munosabat boshqacha bo'ladi. Boisi, o'rtagan olimpiyada yo'llanmasi qo'yilgan...
- To'g'ri aytasiz. Tailanddagi Osiyo chempionatiga hamma jamoalar boshqacha tayyorgarlik va masuliyat bilan kelishadi. Bizning terma jamoamiz tarkib jihatdan aslo kuchsiz emas. Kuchli termalar bilan bemalol o'ynay olishlariga va olimpiyadaga chiqishlariga ishonchim komil.
- Janubiy Koreya, Yaponiya bilan avvalgi safar chorak va yarim final bosqichida o'ynaganmiz. Endi esa Koreya bilan bir guruhdan o'rin oldik...
- Guruhimiz kuchli. SHunday bo'lsada, birinchi o'rin bilan keyingi bosqichga havotirsiz chiqa olishadi. 2018 yil Xitoydagi musobaqada bir bosh ustunligimiz bilingandi. Hech qaysi o'yinni tasodif tufayli yutganmiz deya olmayman. Raqiblarimizni uchta, ikkita to'p farqi bilan mag'lub etganmiz. Menimcha, sensaciyaga qiyoslash noo'rin. Ishqibozlardan OTJ ga ishonishlarini so'rab qolaman. Namanganlik muxlislar bizni qo'llab quvvatlashdan charchashmasin. Mana, bu yil “Navbahor” oldiga chempionlar ligasiga chiqish va chempionlik vazifasi qo'yilmoqda. Ularning olqishlashlar ostida marralarni zabt etamiz degan umiddaman.
Abdulaziz Iskandarov suhbatlashdi
Bosh sahifaga
1329