"Marriott" mehmonxonasiga joylashgan "temiryo'lchilar" kechki payt mehmonxona yonidagi maydonda mashg'ulot olib borishdi. Mashg'ulotda "Loko" bilan tashrif buyurgan barcha futbolchilar ishtirok etdi.
Yangilik sifatida shuni aytishimiz mumkin, "Lokomotiv"da jismoniy tayyorgarlik bo'yicha yangi murabbiy ish boshladi. Bundan buyon jamoaning jismoniy holatini nazorat qilish qozog'istonlik murabbiy Aleksandr SHatskix zimmasiga yuklatiladi.
Aleksandr Anatolevich 1974 yilda tug'ilgan bo'lib, futbolchilik faoliyatida hujumchi sifatida to'p tepgan va Qozog'istonning bir nechta klublarida o'ynagan. U 2009 yil futbolni tugatib, shundan beri murabbiylik kasbi bilan shug'ullanib kelyapti.
Jamoa mashg'ulotida yangilardan yakuniga etgan mavsumni "Surxon"da o'tkazgan Abdulaziz Yusupov bilan chernogoriyalik legioner Slavko Damyanovich ham ishtirok etdi. Har ikki futbolchi klub bilan shartnoma imzoladi.
Malumot uchun, Abdulaziz Yusupov 1993 yil tug'ilgan bo'lib, hujum chizig'ida to'p tepadi. 2013 yil oliy ligadagi ilk mavsumini "Paxtakor"da o'tkazgan hujumchi shundan so'ng "Andijon", "Qo'qon-1912", "Neftchi" va "Surxon" klublarida faoliyat olib bordi. Yusupov o'tgan mavsum termizliklar safida Superliga bahslarida 8ta gol urishga erishdi.
CHernogoriyalik Slavko Damyanovich markaziy himoyachi sifatida harakat qiladi. U faoliyati mobaynida CHernogoriyaning "Mornar Bar", "Suteska Niksich", "Buduchnost Podgorica", Serbiyaning "Spartak", "Baska", Vengriyaning "Bekeshaba-1912" hamda Janubiy Afrika Respublikasining "Bidvest" klublarida to'p tepgan. 27 yoshli himoyachi erkin agent sifatida "Loko" bilan shartnoma imzoladi.
Bosh sahifaga
341