Bugun yurtimiz jamoalaridan tashqari Xitoy, Tailand klublarida muvaffaqiyatli to'p tepgan, "Prachuap" safida kubok sohibiga aylangan tajribali himoyachi Artyom Filiposyan 32 yoshga to'ldi. 1988 yilning 6 yanvar kuni Samarqand shahrida dunyoga kelgan Artyom faoliyati davomida "Mashal", "Nasaf", "Bunyodkor", "Lokomotiv", "Bunyodkor", "Dinamo" (Samarqand), "Buxoro", "Lyaonin Xuvin" (Xitoy), "Prachuap" (Tailand) klublarini sharafini himoya qilgan. O'zbekiston milliy terma jamoasi libosida 13 ta o'yinda maydonga tushgan.
Bugungi qahramonimiz 2011 yilda "Nasaf" bilan birga OFK Kubogini qo'lga kiritgan. Uch mavsum davomida "ajdarlar" safida o'ynagan Artyom chempionat kumush va bronza medallariga ega chiqqan. "Bunyodkor" safida esa O'zbekiston chempioni, ikki bor kubok hamda Superkubok egasiga aylangan.
Filiposyan 2014 yilning fevral oyida Xitoyning "Lyaonin Xuvin" klubi bilan shartnoma imzolaydi. Ammo, CHin yurtida uzoq vaqt ushlanib qolmadi. Futbolchi yana O'zbekistonga qaytib, "Lokomotiv" safiga kelib qo'shiladi. Himoyachi o'tgan mavsumni "Prachuap" klubida o'tkazdi va jamoasi bilan birga Tailand kubogini qo'lga kiritdi. Bu klub Tailand oliy ligasi debyutanti bo'lishiga qaramay, finalga qadar etib bordi. Bosh sovrin uchun bahsda mamlakat futboli bayroqdori "Buriram Yunayted"ni penaltilar seriyasiga ko'ra taslim eta oldi.
- Samarqandda futbolni yaxshi ko'rishadi. Ona shahrimdan Ilhom Yunusov, Erkin Boydullaev, Dilshod SHarofutdinov, Bahodir Nasimov, Anvar G'ofurov, Ilhom SHaripov singari taniqli futbolchilar etishib chiqqan. Niyat qilamanki, vaqti kelib “Dinamo” avvalgi shonini tiklab oladi. Balki, murabbiylik faoliyatimni boshlaganda bolalar bilan ishlarman. Samarqandda istedodlar ko'p, faqat ularni kashf qilish kerak. O'zim ham Samarqanddagi futbol internatini tugatganman. Tez-tez qo'ng'iroq qilib turishadi, yosh bolalar mendan dastxat so'rashadi va rasmga tushishadi. Mahalliy bolalar uchun qo'limdan kelganicha yordam berishga tayyorman, - deydi Filiposyan.
Fursatdan foydalanib, saytimiz ijodiy guruhi va o'quvchilari nomidan Artyom Filiposyanni tug'ilgan kuni bilan tabriklaymiz. Unga sihat-salomatlik, uzoq umr tilaymiz.
BIZNING MA'LUMOT:
To'liq ismi: Artyom Filiposyan
Ampluasi: Himoyachi
Tug'ilgan sanasi: 06.01.1988
Fuqaroligi: O'zbekiston
Tug'ilgan joyi: Samarqand shahri
Bo'yi: 188 sm
Vazni: 78 kg
Bosh sahifaga
1349