Markaziy himoyachi shundan so'ng saytimizga intervyu berdi.
- O'tgan mavsumni ikkita jamoada o'tkazdingiz. Taassurotlaringiz qanday?
- Haqiqatdan ham avvaliga AGMK da bo'ldim. Ammo u erda o'zim istaganchalik ko'p o'ynamadim. SHuning uchun yozgi transfer chog'ida jamoamni o'zgartirishni istadim. “So'g'diyona”dan taklif bo'ldi. Mavsumning ikkinchi qismi men uchun ko'ngildagidek kechdi.
- AGMKda negadir kam o'yin amaliyotiga ega bo'ldingiz. Bu jamoani tanlab afsuslanmadingizmi?
- Endi bundan afsuslanishdan foyda yo'q. Ha, AGMKda deyarli futbol o'ynamadim desa ham bo'ladi. U erda menga shunchaki ishonch bildirishmadi. Xatto Osiyo CHempionlar Ligasining pley-off bosqichida Saudiya Arabistonining “Al Nassr” klubiga yirik 4:0 hisobida yutqazib qo'yilganidan keyin ham va Superkubok doirasidan o'rin olgan “Lokomotiv”ga qarshi o'yinlarda qaydnomaga ham kiritilmadim. Zaxirada imkoniyat berishini kutdim. Tarkibdagi boshqa himoyachilardan kuchsiz emasligimni isbotlashga xarakat qildim. Qaysidir manoda berilgan imkoniyatdan unumli foydalanib, boshqalardan kuchli ekanligimni isbotlab qo'ydim. Ammo bu vaqtda birinchi davra nihoyasiga etib bo'lgandi.
- “So'g'diyona”ga o'tish bu sizning istagingizmi yoki har ikki jamoa shunga kelishdimi?
- Davralar oralig'ida Ulug'bek Istamovich qo'ng'iroq qilib, jamoasida ko'rishni istayotganini bildirdi. “So'g'diyona”ning taklifi men uchun har tomonlama maqul keldi. Keyin AGMK bosh ustozi Mirjalol Qosimov bilan gaplashganimdan so'ng, ketishga qaror qildim. U kishi ikkinchi davrada ko'proq legionerlarga ishonch bildirishini aytdi. SHundan so'ng o'ylanib o'tirmasdan, jizzaxliklar chorlovini qabul qildim. Bildirilgan ishonch uchun Ulug'bek Baqoevga minnatdorchilik bildiraman.
- Mirjalol Qosimov va Ulug'bek Baqoev. Qay biri bilan ishlash qiziqarli kechdi Siz uchun?
- Har ikki murabbiyning ham ishlash uslubi bor. Ularning o'ziga yarasha futbolga qarashi bir-biriga o'xshamaydi. Taktik uslublari turlicha. O'zimga ko'proq ikkinchi davrada Baqoev bilan ishlash yoqdi.
- “So'g'diyona” ikkinchi davrada tezlikni sezilarli darajada oshirdi. Bu ko'proq nima bilan bog'liq?
- Nazarimda ahillik evaziga yutuqlarimiz ko'p bo'ldi. Bosh murabbiy hammani bir maqsad yo'lida jisplashtira oldi. Mahalliy muxlislar yuqori saviyada bizni qo'llab-quvvatlab turdi. SHuningdek rahbariyat tomonidan ham etibor kuchli bo'ldi. G'alabalarimiz zamirida ushbu omillar yotibdi deb bemalol aytishim mumkin.
- Hozirda erkin agentga aylandingiz. Kelgusi rejalaringiz qanday?
- Mavsum yakuniga etgach, oldimda 2-3ta takliflar turgandi. Lekin yana Jizzaxda qolib, “So'g'diyona”da o'ynashni maqul topdim. SHu bois jamoam bilan yana bir yillik kelishuvga erishdim.
Fayzulla suhbatlashdi
Bosh sahifaga
198
