Andrey Miklyaev: "Al Ittihod"ni hurmat qilamiz, lekin qo'rqmaymiz"

Unga yarim himoyachi Oleg Zoteev hamrohlik qildi.  

"Toshkentda o'tgan o'yinda 1:1 hisobi qayd etilgandi. Biz "Al Ittihod"ni hurmat qilamiz, lekin qo'rqmaymiz. Munosib o'yin ko'rsatib kamida mag'lubiyatga uchramaslikka harakat qilamiz", - deydi Miklyaev.

"Barchaga xayrli kun. "Ittihod" uzoq tarixga ega bo'lgan jamoa. Biz o'z tariximizni yozishga urinamiz. Ertaga o'zimizni ko'rsatishga harakat qilamiz. Barcha yigitlar ertangi o'yinda tayyor", - deydi Oleg Zoteev.

- "Lokomotiv" safida jarohat olgan futbolchilar bormi?
- Tarkibda barcha futbolchilar sog'-salomat. Kecha Temurxo'ja Abduxoliqov shamollab qoldi, ammo bu unchalik xavotirli emas. O'tgan uchrashuvda maydonga tusha olmagan Ikrom Aliboev esa aksincha jarohatidan qutuldi. Jarohat olgan futbolchilar yo'q.

- "Lokomotiv"ning stadioni kichik ekanini ko'rdik. Ertaga esa uchrashuv mahobatli "Qirol Abdulloh" stadionida bo'lib o'tadi. Bu o'yinga tasir qiladimi?
- Biz ikkinchi yil Osiyo chempionlar ligasi guruh bosqichida qatnashayapmiz. Bundan tashqari tarkibdagi ko'plab futbolchilar terma jamoa safida bunday katta stadionlarda va ko'plab muxlislar qarshisida o'ynashgan. SHu bois menimcha bu bizga hech qanday muammo tug'dirmaydi.

"Lokomotiv" matbuot xizmati