"Ertangi kun sporti". Temur Olimxo'jaev: "Musobaqadagi maqsadimiz chempionlik"

Musobaqaning ilk uchrashuvida O'zbekiston o'smirlar terma jamoasi Turkmaniston o'smirlari ustidan 5:1 hisobida ustun keldi. Biz o'yin tugagach O'zbekiston terma jamoasi bosh murabbiyi Temur Olimxo'jaevning fikrlari bilan qiziqdik.

"Avvalo bu musobaqa tashkilotchilariga minnatdorchilik bildiraman. Osiyo qitasining eng kuchli jamoalari ishtirokidagi musobaqa biz uchun ayni muddao bo'ldi. Xabaringiz bor, sentyabr oyida Hindistonda U16 Osiyo chempionatida o'tkaziladi. Bizning jamoa mana shu turnirga tayyorgarlikni bugungi o'yin bilan boshladi. Menimcha yildagi dastlabki uchrashuv uchun yomon o'ynamadik. Bir qator yangi futbolchilarni sinovdan o'tkazib oldik, bundan tashqari o'yin taktikasida ham o'zgarishlarni amalga oshirib sinab ko'rdik. Eron va Yaponiyaga qarshi uchrashuvlarga yanada kuchliroq tayyorgarlik ko'ramiz. Bu musobaqadagi maqsadimiz g'olib bo'lish".

"Hindistondagi Osiyo chempionatigacha 6 oy vaqt qolmoqda. Terma jamoa eshigi barcha futbolchilar uchun ochiq. Yani hozirda tarkibda yo'q futbolchilar o'zlarini ko'rsatishsa qita chempionatiga borishlari mumkin. Barchasi ularning o'z qo'llarida. O'sha paytga borib kim tayyor bo'lsa o'sha Hindistonga boradi. Bizda sog'lom raqobat, kuchlimisan marhamat maydonga tush va o'yna. Hindistonga Jahon chempionati yo'llanmasini qo'lga kiritish uchun boramiz", - deydi Temur Olimxo'jaev.

Narzulla Saydullaev