SHundan so'ng, undan klubimiz rasmiy veb-sayti uchun qisqacha intervyu oldik.
- Javlon, “Navbahor”ga xush kelibsiz! Sizni jamoaga kim taklif qildi?
- “Navbahor” klubi vice-prezidenti Oybek Arifovich Samatov menga taklif bilan chiqdilar. Ular bilan suhbatlashganimda, jamoaning oldiga yangi mavsumda yuksak maqsadlar qo'yilayotganligini takidladilar. Namanganga kelganimdan so'ng, Namangan viloyat hokimi Xayrullo Hayitbaevich Bozorov, Namangan shahar hokimi SHavkat SHokirjanovich Abdurazzoqov bilan ko'rishib, suhbatlashdim. Ular ham bu yil “Navbahor” Osiyo CHempionlar Ligasi yo'llanmasini qo'lga kiritish uchun kurash olib borishi, shu maqsadda tarkib kuchaytirilayotganligini aytishdi. Viloyat va klub rahbarlari tomonidan jamoaga katta etibor qaratilayotganligi, maqsad ulkanligini inobatga olgan holda, “Navbahor” bilan shartnoma imzolashga qaror qildim. Xudo xohlasa, yangi mavsumda “Navbahor”ning g'alabalariga o'zimning munosib hissamni qo'shaman, degan umiddaman.
- Jamoaning Turkiyadagi yig'iniga qachon qo'shilasiz?
- “Navbahor”ning Turkiyadagi yig'iniga ertaga qo'shilaman. Ertaga erta tongda Turkiyaga samolyotda parvoz qilaman.
- Futbolga qay tarzda kirib kelgansiz?
- Futbolchi bo'lishimda dadam va to'ng'ich akamning hissalari katta. Ular mening futbolga qiziqishimni ko'rib, qo'llab-quvvatlashgan. SHu darajaga etishimda ularning ularning ulkan mehnatlari samarasi yotibdi. Fursatdan foydanib, otam hamda akamga o'z minnatdorchiligimni bildiraman. Futboldagi ilk saboqlarni esa “CHig'atoy” futbol maktabida olganman.
- Takidlaganingizdek, “Navbahor”ning oldiga bu yilgi chempionatda OCHL yo'llanmasini qo'lga kiritish vazifasi qo'yilmoqda va tarkib ham shunga yarasha kuchaytirilmoqda. “Bunyodkor” safida ko'plab yutuqlarga erishgansiz hamda sovrinlarni yutish borasida ancha tajribalisiz. Yangi jamoangizda ushbu tajribangiz asqotsa kerak?
- Bo'lmasam-chi! O'zingizga malum, futbolchilik faoliyatimning ko'p qismi “Bunyodkor”da o'tgan. Mazkur klub tarkibida ko'plab yutuqlarga erishganman, jumladan, O'zbekiston chempioni va vice-chempioni bo'lganman, O'zbekiston kubogi hamda superkubogini qo'lga kiritganman, shuningdek, Osiyo CHempionlar Ligasida o'ynaganman.
“Navbahor”ga ham ushbu niyatda, yani sovrinlarni yutish uchun keldim. “Bunyodkor”dagi yutuqlarni “Navbahor”da ham takrorlash niyatidaman. Buni amalga oshirish uchun barcha jamoadoshlarim bilan bir yoqadan bosh chiqarib, bir tan, bir jon bo'lib, chempionlikni qo'lga kiritish uchun kurash olib boramiz.
- Muxlislarga qanday tilaklaringiz bor?
- Namangan futbolsevarlar viloyati va bu erda millionlar o'yiniga qiziqish kuchliligini juda yaxshi bilaman. “Navbahor” muxlislaridan jamoamizni yangi mavsumda ham munosib tarzda qo'llab-quvvatlashlarini so'rayman. Biz esa ularning ishonchlarini oqlash, quvonch ulashishga harakat qilamiz.
“Navbahor” PFK matbuot xizmati.
Bosh sahifaga
286