Joriy yilda yuqori maqsadlarni ko'zlagan “Sug'diyona” jamoasi ham o'z tarkibini bir qator tajribali futbolchilar va legionerlar bilan kuchaytirishga erishmoqda. SHuning barobarida o'tgan mavsumdagi tarkib o'zagi ham saqlanib qolindi va ayrim futbolchilar bilan shartnoma uzaytirildi. Ajoyib o'yinlari bilan barchaga tanish bo'lib ulgurgan va jizzaxlik ishqibozlarning yoqimtoyiga aylangan Milan Mitrovich ushbu mavsum ham jamoa darvozasini ishonchli qo'riqlashda davom etadi. Mahoratli kiper biz bilan suhbatda jamoada qolganidan xursandligini yashirmadi.
- Milan, ayni vaqtda mashg'ulotlar qanday kechmoqda? Yangi qo'shilgan futbolchilar chiqishib ketish qiyin bo'lmayaptimi?
- Biz yangi mavsumga tayyorgarlikning birinchi bosqichini yakunladik. Endi hal qiluvchi mashg'ulotlar boshlanadi. Ko'p hollarda ilk kungi mashg'ulotlar futbolchilarga yoqmasligi tabiiy. Asosan yugurish bilan cheklandik. Havo ham sovuq edi. Keyingi kunlarda to'p bilan ishladik, turli taktik mashqlarni bajardik. Superliga bahslari boshlanguniga qadar formaga kirib boramiz. Yangi futbolchilar ketganlarning o'rniga keldi. Maqsadlarimizga erishish yo'lida ular ham foyda keltiradi degan umiddaman. Jamoamizga kelgan o'yinchilar bari tajribali. Ularning yaxshi yoki yomonligini aytish mening vakolatimga kirmaydi. Hammalari mashg'ulotlarda astoydil ishlashmoqda.
- 2019 yil jamoa uchun nihoyatda muvaffaqiyatli yakunlangandi. “Sug'diyona” uchinchi o'rinni qo'lga kiritishga juda yaqin kelgandi. Demak, bu yil o'tgan yilgi natijani yaxshilash maqsad qilib belgilangan bo'lsa kerak...
- Ha. Biz to'rtinchi o'rin bilan kifoyalandik. Bu ohirgi o'n yillikdagi qayd etgan eng yaxshi ko'rsatkichimiz bo'ldi. Garchi biz OCHLga chiqmagan bo'lsakda, muxlislarning bizga nisbatan ishonchi yo'qolmadi. Maqsadimiz yanada yuqori o'rinlardan birini band qilish va shu orqali ishqibozlarga OCHL yo'llanmasini tuhfa qilish.
- Sizni jamoada qolganingiz ko'plab mahalliy muxlislarga manzur kelgani aniq. Ularga aytadigan gapingiz bormi?
- O'zim ham sizga shuni aytmoqchi bo'lib turgandim. Yutsak ham, yutqazsak ham ular biz bilan doim birga. Uchinchi o'rinni qo'lga kirita olmaganimizda jamoadagi barcha futbolchi birdek aybdor. Endi bari tarixda qoldi. Muhimi xatolarimidan to'g'ri xulosa chiqarishimiz zarur.
Abdulaziz Iskandarov suhbatlashdi
Bosh sahifaga
310