Maqsud Karimov: "Tug'ilgan kunim qo'shaloq bayramga ulanib ketdi"

"Stadionni to'ldirib o'tirgan muxlislarga g'alabani taqdim etganimizdan juda xursandmiz. Ikkinchi bo'limda katta kuch bilan oldinga o'tdik va gollar urdik. Keyinchalik esa tashabbusni raqibga berib qo'ydik. Biz g'alabani ertaroq nishonlavordik, chamamda. Lekin men 2:0 hisobini juda qaltis deb bilaman. Odatda hisob 2:0ga o'zgarganidan so'ng futbolchilar o'zini erkin his qilib yuboradi. SHuni hisobiga o'yinimizda ozgina pasayish bo'ldi. Ammo biz kerakli g'alabaga erishib oldik. Bu boshlanishi. Keyingi o'yinlarda ham Xudo xohlasa g'alabalarga erishamiz va muxlislarimizni quvontirib yurishni istaymiz. SHuni juda xohlardimki, har doim minglab ishqibozlarimiz stadionni to'ldirib o'tirishsa. Biz ham qo'ldan kelgancha g'alabalarni ularga sovg'a qilamiz. Tug'ilgan kunimda o'zim gol uraman deb astoydil harakat qilganim yo'q. Muhimi bu jamoamizning yutug'i. To'g'risi, o'yindan oldin yaxshi niyat qilgandim. Gol urishni istagandim, ammo aynan gol urish uchun emas, jamoamiz foydasiga xizmat qilish maqsadida harakat qildim. Tug'ilgan kunim qo'shaloq bayramga aylandi. Bundan albatta juda baxtiyorman. Hakam xushtagidan so'ng barchamiz bir-birimizni tabrikladik. Odatdagidek murabbiy ham hammani g'alaba bilan muborakbod etdi. Endi esa keyingi o'yin haqida o'ylashni boshlaymiz va bor etiborni shunga qaratamiz", - deydi Maqsud Karimov.