Jasur Abduraimov: "Xitoydagi musobaqa biz uchun ancha foydali bo'ldi"

Jasur Abduraimov boshchiligidagi yoshlarimiz to'rtta jamoa qatnashgan musobaqada chempion bo'lgani haqida xabar bergandik. Biz Toshkentdagi o'tayotgan "Ertangi kun sporti" musobaqasi doirasidagi O'zbekiston U16 - Turkmaniston U16 o'yinini kuzatgan Jasur Abduraimovning Xitoydagi musobaqa taassurotlari bilan qiziqdik.

"Xitoydagi xalqaro musobaqa avvalo Bahrayndagi U19 Osiyo chempionati tayyorgarlik vazifasini o'tab berdi. U erda biz Xorvatiya, Xitoy va Filippin kabi jamoalariga qarshi o'ynadik.

Birinchi turda Xorvatiya bilan kuch sinashdi. Evropa jamoasi ancha tezkor, yaxshi tashkil etilganini ko'rdik. Bu o'yinda 1:1 hisobi qayd etildi. Keyin mezbon Xitoy bilan o'ynadik. SHaxsan men uchun Xitoy Osiyo qitasining eng kuchli jamoalaridan biri hisoblanadi. 3:1 hisobida yutgan bo'lsak ham o'yin oson o'tgani yo'q. So'nggi turni Filippinga qarshi o'tkazdik. Aytish mumkinmi bu bahsda biz raqibdan barcha jabhada ustun bo'ldik va 9:0 hisobida g'alabaga erishdik

Aytganimdek bu Osiyo chempionatiga tayyorgarlik doirasida foydali musobaqa bo'ldi. Himoyadan hujumga o'tish va hujumda 3-zonada o'ynash kabi ikkita taktikani sinovdan o'tkazib oldik. To'g'ri yo'ldan ketayapmiz. Qita chempionatiga qadar vaqt bor, 3-4ta joyni kuchaytirishimiz kerak. Keyingi rejalarga kelsak mart oyida Toshkentda yig'in o'tkazamiz. Menimcha bitta o'rtoqlik uchrashuvi o'tkazsak kerak", - deydi Jasur Abduraimov.

Eslatib o'tamiz, O'zbekiston yoshlar terma jamoasi 13-30 oktyabr kunlari Bahraynda bo'lib o'tadigan Osiyo chempionatida ishtirok etadi. 

Narzulla Saydullaev