Oliy liga. Bugungi o'yinlarda kimda imkoniyat qanday?

"Qo'qon-1912" - "Obod"
Oliy liga debyutanti "Obod" klubi elitadagi dastlabki rasmiy bahsni "Qo'qon-1912"ga qarshi safarda o'tkazadi. O'yinda Murod Ismoilov jamoasining imkoniyatlari balandroq. Sababi jamoa o'z uyida muxlislari qarshisida o'ynaydi. Toshkent klubi dastlabki muhim sinovdan qanday o'tishini bugungi o'yin orqali ko'ramiz.  
Imkoniyatlar: 55/45

"Buxoro" - "Olmaliq"
O'tgan yil "Olmaliq" Buxorodan 4:0 hisobida g'alaba bilan qaytgandi. Biroq "Buxoro" yangi mavsum oldidan o'z tarkibini kuchli va mahoratli futbolchilar bilan to'ldirib oldi. SHkvirin esa doimgidek yoshlar va bir nechta tajribali futbolchilarga ishonadi. Ikkala jamoaning ilk turdagi imkoniyatlarini teng baholadik.
Imkoniyatlar: 50/50

"Qizilqum" - "Mashal"
Navoiy klubi dastlabki turni o'z uyida "Mashal"ga qarshi o'tkazadi. Bahsda "Qizilqum"ning imkoniyatlari yuqoriroq. Biroq "Mashal" safarda bu jamoaga 9 yildan buyon yutqazmay kelayotganini ham unutmaslik kerak. Ikkala klub ham qishda transfer bozori vaqtida songa emas sifatga etibor qaratdi.
Imkoniyatlar: 55/45

"Metallurg" - "So'g'diyona"
Bekobod klubi o'z ananasiga sodiq qolib bu yil ham transfer bozorida u qadar faol bo'lmadi. Jamoani etakchilardan Javlon Mirabdullaev, Ruslan Vagapov, Alisher Ziyovuddinov va SHahzodbek nurmatov tark etishdi. "So'g'diyona" esa tarkibini 16 nafar yangi futbolchi bilan to'ldirib oldi. Davron Fayziev jamoasi o'tgan yil oliy ligada o'tish o'yini orqali qolishga erishgandi. Bu yil klub autsayderlar orasida bo'lmasligini isbotlamoqchi.
Imkoniyatlar: 55/45

"Bunyodkor" - "Neftchi"
Bu mavsumda oliy liga klublari orasida eng ko'p rasmiy o'yin o'tkazgan "Bunyodkor" klubi oliy ligadagi ilk bahsni Toshkentda "Neftchi"ga qarshi o'tkazadi. O'tgan mavsum farg'onaliklar bu jamoaga qarshi kechgan ikkala bahsda ham g'alabaga erishishgandi. Biroq bugungi bahsda o'yin amaliyoti ko'proq ekanligi tufayli "Bunyodkor"ning imkoniyatlari biroz ustunroq.
Imkoniyatlar: 55/45