Ikki kun (23-24 fevral) davomida “Nasaf” FK Akademiyasi yashil maydonlarida nafaqat voha, balki Respublika futboli rivojiga salmoqli hissa qo'shgan fidoiyi inson, o'z davrida Qashqadaryo viloyati hokimi bo'lib ishlagan marhum Nuriddin Zaynievich Zayniev xotirasiga bag'ishlangan birinchi xalqaro xotira turniri bo'lib o'tdi. Unda - “Nasaf” (Qarshi), “SHo'rtan” (G'uzor), “Mashal” (Muborak) hamda “Regar-TadAZ” (Tursunzoda, Tojikiston) kabi jamoalarning 18 yoshgacha bo'lgan o'smirlaridan iborat futbolchilar ishtirok etishdi.
Dastlabki kuni, yarim finallarda quyidagi natijalar qayd etildi:
“Nasaf” - “Mashal” - 4:1, “SHo'rtan” - “Regar-TadAZ” - 4:2.
Turnirning hal qiluvchi kunida bosh sovrin uchun maydonga “Nasaf” hamda “SHo'rtan” jamoalari tushishdi. Unda turnir mezbonlari 4:0 hisobida zafar quchishdi.
Uchinchi o'rin uchun kechgan bahsning asosiy vaqti 1:1 hisobida yakunlandi. Penaltilar seriyasida muboraklik futbolchilar g'alaba qozonishdi.
SHunday qilib, Abdurahmon Yumangulov va Ixtiyor Karimov murabbiyligidagi g'uzorlik yosh futbolchilar Nuriddin Zayniev xotirasiga bag'ishlangan xalqaro turnirda sovrindor bo'lishdi.
“SHo'rtan” PFK matbuot xizmati
Bosh sahifaga
222