Dilyaver Vaniev boshchiligidagi “gazchilar” Superliganing ilk turini o'z maydonida Jizzaxning “So'g'diyona” klubiga qarshi o'tkazib 3:0 hisobida g'alaba qozonishdi. To'g'risi bunday natijani xatto “Mashal”ning ashaddiy muxlislari ham kutishmagani bor gap. Jizzaxda tug'ilgan Mo'min Meliev shu kuni “Mashal” hujum chizig'ida o'ynadi va 1-daqiqadayoq “So'g'diyona” darvozasini ishg'ol qilishga muvaffaq bo'ldi.
- Superliganing dastlabki turida "So'g'diyona"ni 3:0 hisobida mag'lub etishinglarni deyarli hech kim kutmagandi. SHu kuni "Mashal" nimaning evaziga g'alaba qozondi deb o'ylaysiz?
- Superligada oson o'yinlar bo'lmasligini barcha yaxshi biladi. Dastlabki turda o'z muxlislarimiz qarshisida Jizzaxning "So'g'diyona" klubiga qarshi maydonga tushdik. Ulug'bek Baqoev boshchiligidagi jamoa o'tgan mavsum sal qolsa Osiyo chempionlar ligasi yo'llanmasini qo'lga kiritishi mumkin edi. Bu yilgi mavsumdan oldin Jizzax klubi safiga bir qator tajribali va mahoratli futbolchilar qo'shilishdi. Lekin bir jamoa bo'lib bor kuchimiz bilan harakat qildik va xudoga shukur g'alabaga erishdik. Bahsda kim gol urishining farqi yo'q, eng asosiysi "Mashal" g'alaba qozonsa bo'lgani. Muxlislarimiz Superligani ancha sog'inib qolishgani ko'rindi. Ularni keyingi o'yinlarda ham xursand qilishga harakat qilamiz. Stadionga yanada ko'proq muxlislar kelsa ajoyib bo'lardi.
- 2020 yilgi Superliganing eng tezkor golini urdingiz, o'sha lahzada qanday hissiyotlar o'tdi?
- Aytganimdek kim gol urishining farqi yo'q, jamoa yutsa bo'ldi. Uchrashuv boshida o'ng tomondan darvozaga zarba berildi, darvozabondan qaytgan to'pni darvozaga yo'lladim. O'sha paytda ichimdan qanday hissiyotlar o'tganini so'z bilan tariflab bera olmayman. To'g'risi o'sha lahzada ham, keyin ham eng tezkor gol ekanini bilmagandim.
- Golni Eldor SHomurodov kabi nishonladingiz? U sizning kumiringizmi?
- Albatta, SHomurodov "Mashal" tarbiyalanuvchisi va havas qilsa arziydigan hujumchi. Kelajakda u kabi legionerga aylanishni xohlayman. "Mashal" yulduzlarni etishtirib beradigan klub hisoblanadi.
- O'tgan mavsum PRO-ligada o'ynab ko'plab gollar urdingiz Superligada nechta gol ura olaman deb o'ylaysiz?
- Buni albatta vaqt ko'rsatadi. Superligada ko'p gol urishim uchun ko'proq mehnat qilishim kerakligini juda yaxshi bilaman. Murabbiylar ko'rsatmalarini to'g'ri bajara olsam xudo xohlasa ko'plab gollar uraman.
- PRO-ligada o'ynadingiz, Superligada bitta turda maydonga tushdingiz. Ligalar orasida qanchalik farq bor?
- Bir narsani takidlashni istardim, 2016 yil “Mashal” safida oliy ligada uchta o'yinda maydonga tushganman, yani ko'pchilik o'ylagandek yuqori ligada bu yil debyut qilmadim. Elitaning quyi ligadan farqi bor albatta. Eng asosiy farqlaridan biri bu Superligadagi o'yinlarda tempning yuqoriligi. Jamoalar ham, futbolchilar ham anchayin tajribali va kuchli. Stadionlar ham yaxshiroq.
- Asli jizzaxliksiz “So'g'diyona”ga qarshi bahs siz uchun boshqa o'yinlardan farq qiladimi?
- Barcha o'yinga bir xil tayyorgarlik ko'raman. Lekin “So'g'diyona” bilan bahs boshqacharoqdek tuyuladi. To'g'ri Jizzaxda tug'ilganman, biroq professional futbolchi sifatida hozir o'ynayotgan klubimga foyda keltirishim kerak. Buni muxlislar to'g'ri tushunishadi deb o'ylayman.
- “Andijon”da o'ynayotgan Siroj Meliev sizning akangizmi?
- Hayotda aka-ukadekmiz, lekin faqat familiyamiz bir xil xolos. U bilan tez-tez gaplashib turaman. O'yinlardan oldin fikr almashib turamiz. Bo'yi mendan pastroq bo'lgani uchun yoshi katta bo'lsa ham hazillashib ukam deyman (kuladi).
- Ikkinchi turni Toshkentda “Bunyodkor”ga qarshi o'tkazasizlar, bu o'yindan nimalar kutayapsiz?
- “Bunyodkor” yaxshi jamoa, o'zbek futbolidagi eng kuchli klublardan biri. Bekorga o'tgan mavsum uchinchi o'rinni egallamadi. Ular ham birinchi turda Termizda g'alaba qozonishganidan xabarimiz bor. Biz Toshkentga sayr qilgani bormaymiz va muxlislarga yoqadigan o'yin ko'rsatib Muborakka xudo xohlasa ijobiy natija bilan qaytmoqchimiz.
- Mo'min Melievning kelajakdagi orzulari qanday?
- Orzularim juda ham ko'p. Ammo ularni aytmoqchi emasman. Xudo xohlasa qattiq mehnat qilib, sabr bilan barchasiga navbatma-navbat erishmoqchiman.
Narzulla Saydullaev suhbatlashdi
Bosh sahifaga
203