Kasallanganlar soni 7900 kishidan oshib ketdi, 450 kishi virusdan vafot etdi.
Bu voqealar fonida Evropa top chempionatlari orasida italiyaliklar birinchilardan bo'lib liga bahslarini to'xtatishga qaror qilishdi. Umumiy qilib hisoblaganda A Seriyaning har bir turida stadionlarga 800 ming kishi tashrif buyuradi, shu sababli chempionat to'xtatilishi hayron qolarli voqea emas.
"Yuventus" hamda "Inter" o'rtasidagi uchrashuv muxlislarsiz o'tdi. Krishtianu Ronaldu "ko'rinmas muxlislar"ga besh tashlab, kayfiyatni ko'tarishga harakat qilganiga qaramay, o'yin huddi o'rtoqlik uchrashuvidek o'tdi. Futbolchi va murabbiylarning har bir so'zi eshitilishi - noodatiy holat.
Hozir A Seriya rahbariyati hech narsa qila olmaydi, chunki vaziyatga davlat rahbariyatidagilar aralashgan. Italiya bosh vazirining shaxsan o'zi chempionat to'xtatilgani haqida elon qildi:
"Boshqa kuta olmaymiz. Raqamlar kasallanganlar va vafot etayotganlar soni oshib borayotgani haqida gapirmoqda. Italiya foydasini ko'zlab bazi yoqimsiz qarorlarni qabul qilishimiz kerak. A Seriya va boshqa sport tadbirlari to'xtatiladi. Muxlislar buni qabul qilishi kerak" - deydi bosh vazir.
Sana haqida to'xtaladigan bo'lsak, uchrashuvlar kamida 3 aprelgacha o'tkazilmaydi. Italiya klublari evrokuboklarda nima qilishni bilmay, boshi qotgan. Masalan, "Yuventus" keyingi seshanba kuni CHempionlar ligasi 1/8 final javob uchrashuvi doirasida "Lion"ni qabul qiladi. Hozircha bu borada aniqlik kiritilmagan, ammo katta ehtimol bilan o'yin muxlislarsiz o'tadi yoki Turindan tashqarida bo'ladi. Eng hayratlanarli natija - Franciya jamoasining texnik g'alabasi bo'ladi, ammo UEFA bu ishga qo'l urmasa kerak.
Italiya klublari uy uchrashuvlarini o'zida o'tkazish masalasini hal qilgan taqdirda ham italiyaliklar Evropada eng ko'p aziyat chekkan klublar bo'lishadi. CHempionat to'xtatilgani tufayli ular futbolchilarning formasini bir ritmda saqlab tura olishmaydi. Italiya klublari faqat chet elda o'tkaziladigan o'rtoqlik o'yinlaridan umid qilishlari mumkin.
Yana bir muammo - A Seriyaning qolgan o'yinlari nima bo'ladi? CHempionat 3 apreldan davom etadi desak ham taqvimni surish qiyin va liga bahslari mayning oxirigacha yakunlanmaydi. CHempionat o'yinlarini bir necha haftaga uzaytirish qarori haqida o'ylash noto'g'ri, chunki bu yil yozda Evropa chempionati o'tkaziladi.
Umuman olganda, hozircha savollar ko'p, ammo tez orada javoblar paydo bo'lishi kerak. Albatta, xavfsizlik birinchi o'rinda, biroq Italiya klublari, muxlislari juda xafa bo'lishi aniq.
Bosh sahifaga
779