London klubi o'qsiz avtomatga o'xshatilmoqda

Uchrashuvdan so'ng “Manchester Yunayted”ning sobiq himoyachisi Rio Ferdinand “shporlar” bosh murabbiyi Joze Mourinyoni keskin tanqid qildi.
“Hozir londonliklarning kayfiyatiga havas qilib bo'lmaydi. Allining bildirgan hissiyotlarini tushunib turibman. Qizig'i, u alamli mag'lubiyat haqida gapirmadi, balki jamoaviy o'yin darajasining pastligiga asosiy urg'u berdi. Muxlislar ham o'zlari kutgan murabbiyni maydonda ko'rmayotganliklaridan norozi.
Lukas Moura va Deli Alli hujumchilarsiz chiziqda asosiy vazifani bajarishlariga to'g'ri keldi. SHu kuni “Tottenxem”ning o'yini o'qsiz avtomatga o'xshab ketdi. Son Xyon Min eng kerakli vaziyatda jamoasiga yordam bera olmadi. Ular nima qilayotganlariga o'zlari ham tushunishmadi. To'g'risi, bu jamoada Jozening kelajagini ko'rolmayapman. Har bir klubning o'z oldiga qo'ygan ulkan rejalari bo'ladi. Bu esa ko'p faktorlar bilan futbolchilarga, ayniqsa hujumchilarga bog'liq. Tan olish kerak, Keyn va Sonning yo'qligi jiddiy kamchiliklarni keltirib chiqarishi kutilayotgandi. Lekin bu hammasi tugadi degani emas-ku. Bo'sh poziciyalarni etarlicha to'ldirishning har doim iloji bo'lgan va bu borada endi murabbiylar shtabi katta sahnaga chiqishi kerak edi.
To'g'ri, futbolchilar ijtimoiy tarmoqlarni kuzatishadi, matbuot anjumanlarida qatnashishadi, ammo ular bilan maydonda ishlash boshqacha effekt beradi. Maydonda murabbiy kerak bo'lsa, futbolchilardan ham ko'proq ishlashi kerak. Mourinyuda esa men bu hislatlarni ko'rmayapman. U “shporlar”ning o'yin uslubiga umuman mos kelmaydi deb o'ylayman. Aksincha, uning kechagi raqibi Negelsman to'g'risida ancha iliq fikrlarni aytish mumkin. 32 yosh bo'lishiga qaramay, u “Leipsig” tarixidagi eng yaxshi natijaga erisha oldi”, - deydi Ferdinand.
Malumot uchun, londonliklar barcha turnirlarda ketma-ket 6 o'yindan buyon g'alaba nimaligini bilmay kelishmoqda.