Ilk turda Toshkentda "Paxtakor"ga imkoniyat boy berilgan bo'lsa (1:2), ikkinchi turda Namanganda "Lokomotiv" taslim etildi. Mazkur bahslarda "lochinlar"ning yangi himoyachisi Xurshidbek Muxtorov ishtirok etdi. Biz Superliganing 3-turidan oldin futbolchi bilan suhbatlashdik.
- 2020 yilgi Superliganing dastlabki turini Toshkentda "Paxtakor"ga qarshi o'tkazdinglar. "Navbahor" hisobda oldinda borib yakunda mag'lub bo'ldi. O'sha bahsni qanday yodga olasiz?
- "Paxtakor" bilan o'yindagi mag'lubiyat juda ham alamli bo'ldi. Buni barcha ko'rdi. Mavsumni g'alaba bilan boshlashni juda ham xohlagandik. Biroq turli sabablarga ko'ra bunday bo'lmadi. Hayot davom etadi. O'yindan keyin kiyim almashtirish xonasida barcha yigitlar bilan birga mag'lubiyatni unutib, uyda "Lokomotiv"ga qarshi bahsga yaxshi tayyorlanish va yutishni maqsad qilib qo'ydik.
- O'sha mag'lubiyatdan so'ng "Lokomotiv"ga qarshi bahsga tayyorgarlik ko'rishda futbolchilarda ruhiy qiyinchilik kuzatilmadimi?
- "Lokomotiv" bilan bahsga tayyorgarlik ko'rishda jamoadoshlarimda ruhan qiyinchilik bo'lmadi deb o'ylayman. CHunki "Navbahor" 2020 yilgi mavsumda o'z oldiga katta maqsadlarni qo'ygan. Klub Osiyo chempionlar ligasida o'ynamoqchi, bu maqsad yo'lida har bir o'yinga jiddiy tayyorgarlik ko'rib, har qanday vaziyatga ham jismonan, ham ruhan tayyor bo'lish lozim. "Navbahor" jamoasida juda yaxshi futbolchilar yig'ilgan, barcha professional. Navbatdagi o'yinga o'zini qanday tayyorlashni juda yaxshi biladi. Barchasi futbolchilarning o'ziga bog'liq deb o'ylayman.
- "Temiryo'lchilar" bilan o'yinda 2:0 hisobidagi g'alaba qo'lga kiritildi. Bu bahs haqida nima deya olasiz?
- "Lokomotiv"ga qarshi o'yin juda zo'r o'tdi. O'z maydonimizda, stadion to'la muxlislar qarshisida o'ynadik. SHu bois ilk daqiqalardan hujumga o'tdik va bir nechta xavfli vaziyatlar yarata oldik. Bir marta to'p ustunga ham tegib qaytdi. Ikkinchi taymda hujumlarimiz samara berdi va ikkita gol ura oldik. Xudoga shukur g'alabaga erisha oldik va muxlislar oldida yuzimiz yorug' bo'ldi. SHu kuni barcha yigitlar maydonda jonini berib harakat qildi. Muxlislarni xursand qilganimizdan mamnunmiz. Xudo xohlasa, keyingi o'yinlarda ham ijobiy natijalarga erishib, ularni xursand qilishda davom etamiz.
- Muxlislar bilan to'lgan stadionda o'ynash futbolchilaga qo'shimcha bosim yuklaydimi yoki aksincha?
- Aksincha, stadion to'lgani futbolchilarga qo'shimcha kuch beradi. Har qanday futbolchi muxlislar bilan to'lib-toshgan stadionda o'ynashni istaydi. SHu bois bosim bo'lgani yo'q, barchamiz maza qilib futbol o'ynadik. Har bir o'yinda stadion mana shuday to'lishini kutamiz.
- Andrey Kanchelskis g'alabadan so'ng futbolchilarga nimalar dedi?
- Bosh murabbiy barchani tabrikladi va g'alabani tezroq unutib, navbatdagi "Andijon"ga qarshi bahsga tayyorgarlik ko'rishimizni aytdi.
- Superliganing 3-turini "Navbahor" 15 mart kuni Andijonda "Andijon"ga qarshi o'ynaydi...
- "Andijon" bu mavsum o'z maydonidagi ilk uchrashuvni "Navbahor"ga qarshi o'tkazadi. Ochilish o'yinida "Sog'lom Avlod" stadioniga minglab tomoshabinlar kelishi aniq. Bo'lajak o'yin muxlislarga yoqadigan, haqiqiy derbiga xos tarzda o'tishiga hech qanday shubha yo'q.
Bosh sahifaga
1420