Transferlar oynasi vaqtida faol klublarimizdan biri bo'ldi desak yanglishmaymiz.Boisi, jamoa bu yil oldiga har yiligiga qaraganda yuqoriroq maqsadlarni qo'ygan. Bundan bir necha mavsum oldin qo'qonliklar tarkibida yorqin o'yinlar o'tkazgan, qator gollari bilan muxlislar qalbidan joy olgan serbiyalik hujumchi Filip Raevac jamoaga qaytdi. Superliga 3-turdan joy olgan “Sug'diyona”ga qarshi bahsdan so'ng futbolchini futbolchini suhbatga tortdik.
- Filip, “Qo'qon-1912”ga qaytishga qaysi omillar sabab bo'ldi? Nima majbur qildi?
- Men ikkinchi bor mazkur klub safiga qo'shildim. Xursandchiligim cheksiz. Birinchi bor to'p tepgan mavsumimda ko'plab gollar urgandim. Biz birinchi davrada sovrinli o'rinlar uchun kurashgan edik. So'ng 2018 yil boshida menga “Bunyodkor”ning o'sha vaqtdagi bosh murabbiyi Mirjalol Qosimovdan taklif bo'ldi. Qo'qonga qaytishimga ajoyib jamoa, jonkuyar muxlislar, mehribon murabbiylar shtabi sabab bo'ldi. Bu jamoaning ishqibozlari meni juda yaxshi qarshi oldi. 2017 yil birinchi davrani ikkinchi o'rinda yakunlaganmiz. Ajoyib mavsum bo'lgandi. Buni yana bir bor takrorlashga urinamiz.
- Eshitshimizga qaraganda Baxtiyor Ashurmatov AGMKda ishlayotgan paytida sizga qiziqish bildirgan ekan...
- Ha. Nisbatan to'g'ri. Men “Bunyodkor” safida harakat qilayotgan davrimda AGMKga ko'plab gollar urganman. Adashmasam, qaysidir bahsda men olmaliqliklar darvozasiga ikkita to'p kiritdim. Natijada, menga Bahtiyor Ashurmatov tomonidan taklif bo'ldi. Ammo, meni poytaxt jamoasi tekinga qo'yib yuborishni istamadi. Mana, taqdir ekan ushbu mutaxassis bilan birga ishlash imkoniyati paydo bo'ldi. Men uni hurmat qilaman, har qanday qarorini tushunaman. Bahtiyor Ashurmatov menga ishonishini, jamoaga yordam berishimni takidladi.
- “Lokomotiv”ga ulkan umidlar bilan o'tgandingiz. Sizdan murabbiylar shtabi, muxlislar ko'p narsa kutgandi. Biroq, 7ta o'yinda 1 gol hujumchiga xos natija emas...
- Menga o'yin amaliyoti va o'zimni ko'rsatishim uchun vaqt berishmadi. Ikki yil Qo'qon va poytaxtda jami 18ta gol urdim, assistentlik qildim. Yomon natija qayd etmadim. Mirjalol Qosimovga ko'p ishlashim, mehnat qilishim yoqqani sabab meni “Bunyodkor”ga chaqirdi. O'ylaymanki, bu yil men va jamoamiz uchun eng yaxshi mavsumlardan biri bo'ladi. Maqsadimiz kuchli beshlikdan joy olish.
- Deylik, 2017 va 2018 yillarda “qaldirg'ochlar” tarkibida raqobat yaxshi darajada bo'lgan. Klub akademiyasi tarbiyalanuvchilari ham asosiy tarkibda to'p tepardi. Sizni ko'p hollarda zahirada qolishingiz raqobat bilan bog'liqmi?
- Men raqobatdan qo'rqqanimda “Bunyodkor”ga o'tmasdim. O'zimni yangi qirralarimni ochish, yangi darajaga chiqish uchun murabbiy chorlovini qabul qilganman.
- Jamoadoshingiz Ivan Yosovich siz haqingizda juda iliq gaplar aytgandi. U himoya chizig'ida harakat qiladi. Lekin, qishiki yig'inlardagi o'rtoqlik o'yinlarida bir nechta to'p kiritdi....
- Ivanni juda yaxshi bilaman. U jamoamiz himoyasini kuchaytirishga qodir. Umuman barcha chiziqlarda yuqori darajadagi o'yinchilar jamlangan.
- “Sug'diyona”ga qarshi kechgan uchrashuvda uch ochko rasmiylashtirildi. G'alaba nimaning hisobiga qo'lga kiritildi? Balki, raqibd ruhiy tomondan pasayish kuzatilgandir...
- Hisobdan ham ko'rinib turibdiki, o'yin oson bo'lmadi. Raqib kutganimizdanda jiddiy qarshilik ko'rsatdi. CHunki, ularga g'alaba suv va havodek zarur edi. Penaltidan darvozamizni ishg'ol qilishgach ularda ishonch paydo bo'ldi. SHu sabab oldinga o'tishga, bosimni oshirishga intildi. Biz esa o'zimiz yaratgan vaziyatdan unumli foydalandik. Maydonga chiqib barchaning ishonchini oqlaganimdan xursandman. Har bir turda foyda keltirishga harakat qilaman.
Futbolchi haqida to'liq malumot.
Filip Raevac
Tug'ilgan sanasi va joyi: 1992 yil, 21 iyun. Yugoslaviya, Valevo shahri.
Bo'yi: 186
Poziciyasi: hujmchi
To'p tepgan klublari: “Buduchnost”(Serbiya), Edinstvo( Serbiya), “Krushik”(Serbiya), “Kolubara”(Serbiya), “Jeleznichar”(Serbiya), "Syarka"(Polsha), “OFK Belgrad”(Serbiya), “Qo'qon-1912”(O'zbekiston), “Bunyodkor”(O'zbekiston), “Lokomotiv”(O'zbekiston), “FK Indjiya”(Serbiya).
Abdulaziz Iskandarov suhbatlashdi
Bosh sahifaga
206