"Dinamo": Naumov, Xoliqov, Haydarov, Bobojonov keldi

Mahalliy murabbiy Uchqun Qobilov qo'l ostida o'tayotgan o'quv-mashg'ulot yig'inida mahalliy futbolchilar bilan bir qatorda yangi futbolchilar ham tayyorgarlikka zo'r berishgan.

Jumladan, jamoa tarkibida mahalliy futbolchilardan Akmal Bozorov, Komil SHarofutdinov, Jasur Azimov, Firdavs Abdusalimov, Islom SHaripov, Bunyod Isroilov, Omad Tayloqov, Laziz Nuriddinov, Mirkomil Lokaev, Rustam Toshturdiev, Jonibek Ko'chimov va yana bir qator yosh futbolchilarni ko'rish mumkin.

SHuningdek, Dinamo safida 2013-2014 yillarda to'p surgan Azamat Bobojonov ham yana sobiq klubi safiga qaytdi. Qoraqalpog'istonlik 28 yoshli yarimhimoyachi o'tgan mavsumni Navbahor safida o'tkazgandi.

O'tgan mavsumda Navoiyning Qizilqum klubi sharafini himoya qilgan tajribali hujumchi Alisher Xoliqov ham Dinamo tarkibiga kelib qo'shilgan. 2010 yilgi Oliy Liganing eng yaxshi to'purari jamoa mashg'ulotlarida ishtirok etmoqda.

Jamoa yig'inida bo'lgan yana bir futbolchi Farrux Haydarov ham Dinamoga Navoiyning Qizilqum klubidan kelib qo'shildi.

Mashal, Nasaf, So'g'diyona jamoalaridagi o'yinlari bilan tanilgan tajribali darvozabon Mixail Naumov ham ayni damda jamoa bilan birga. O'tgan mavsumni Oqtepa klubi safida o'tkazgan posbon yangi mavsum oldidan Dinamo safida ko'rikdan o'tmoqda.

Joriy mavsumdayoq Oliy Ligaga qaytishni maqsad qilgan Dinamo klubi hozirda yana bir qator futbolchilar bilan muzokara o'tkazmoqda. Jamoa azolari yaqin kunlarda tibbiy ko'rikdan o'tishgach, nazorat uchrashuvlariga kirishishadi.