Bir necha kun oldin Andrea Pirlo "Yuventus"dagi ilk mavsumidan qiziq bir jihatni esga oldi: "Faqat chap oyoqda o'ynagan bahslarim bo'lgan. O'ng tizzam og'rirdi, shu sababli faqat bir oyoqdan foydalanishga to'g'ri kelgan. "Lechche", "Novara" va "Napoli"ga qarshi shunday bo'lganini eslayman".
Ishonish qiyin bo'lgan hikoya. Ammo Pirlo yolg'on gapirmagan, biroz bo'rttirib yuborgan. Uning gapida "faqat" so'zi ortiqchaga o'xshaydi, chunki Andrea o'ng oyog'ini ham ishlatib turgan. Lekin italiyalikning o'sha paytdagi harakatlarini ko'rganingizda, uni chapaqaydan ajrata olmagan bo'lardingiz.
Bu Antonio Kontening Turindagi dastlabki mavsumi edi, "Yuventus" tezda o'rtamiyona jamoadan sovrin uchun asosiy davogarlardan biriga aylandi. Jamoa Pirloning kuchli sifatlari atrofida qurilgan.
Konte o'sha paytda quyidagi gaplarni aytgandi: "Andreadek futbolchilarni topish juda qiyin. Uning texnikasi yuqori darajada. To'p bilan bo'lsak u butun jamoaga xotirjamlik bag'ishlaydi va vaziyatlarni juda yaxshi o'qiydi. Agar bu iqtidorga hamma nima qilishni biladigan tizimni qo'shsak, uning sifatlari yanada kuchliroq porlaydi. Jismoniy holat uning kuchli tomoni emas, Pirloning fikrlash va to'p bilan muomalada bo'lish qobiliyati fantastik darajada. To'g'ri sharoitda u butun jamoani boshqara oladi".
O'sha yili Antonio aynan shu jarayonni ishga tushirgan edi. Andreaning jamoadagi obro'si juda baland bo'lgan. U "Milan"ning keraksiz o'yinchisidan A Seriyaning yil futbolchisiga davogarlik qiladigan futbolchisiga aylandi.
O'shandayoq Konte va Pirlo o'rtasida o'zgacha aloqa paydo bo'lgandi. Andrea bir necha bor Antonioni "daho" va "faoliyatidagi eng yaxshi murabbiy" deb atagandi.
"Agar Arrigo Sakki daho bo'lsa, Konteni nima deb atay, bundan yaxshiroq so'z bormi? Men uni yaxshi murabbiy deb o'ylagandim, ammo bunchalik ekanligini tasavvur ham qilmagandim. Kerakli vaqtda Antoniga duch keldim. U meni hammadan ko'proq hayron qoldirdi" - deb yozgandi Pirlo o'z avtobiografiyasida.
Andreadan yana bir iqtibos: "Konte futbolchilar bor kuchini ishga solishini xohlaydi. U seni maksimal darajangdan ham yaxshiroq harakat qilishga undaydi".
Pirlo tezda Konte madaniyatiga ko'nikdi va u uchun ko'p narsalarga qodir edi. Masalan, tizzasidagi jarohat bilan o'ynash. O'yin Pirlo atrofida qurilgani tufayli Konte bilan shunday kelishuv bo'lgan: Andrea muhim bahslarda maydonga tushadi, ammo Andrea o'ng oyog'idan minimal darajada foydalanadi. Oddiy futbolchi uchun bu aqlga sig'maydigan g'oya edi. Ammo Pirlo dahoku.
Andrea jarohat bilan harakat qilgan o'yin natijalari:
| Pirlo jarohatda o'tkazgan o'yinlari | ||
|---|---|---|
| 26.11.2011 | Lacio - Yuventus 0:1 | 90 daqiqa |
| 29.11.2011 | Napoli - Yuventus 3:3 | 90 daqiqa |
| 04.12.2011 | Yuventus - CHezena 2:0 | o'ynamagan |
| 09.12.2011 | Yuventus - Bolonya 2:1 | o'ynamagan |
| 12.12.2011 | Roma - Yuventus 1:1 | 90 daqiqa |
| 18.12.2011 | Yuventus - Novara 2:0 | 80 daqiqa |
| 21.12.2011 | Udineze - Yuventus 0:0 | 90 daqiqa |
| 08.01.2012 | Lechche - Yuventus 0:1 | 88 daqiqa |
Pirlo davolanayotgan paytda uchrashuvlarning 76%da ishtirok etdi. "CHezena" bilan bahs A Seriyada o'tkazib yuborilgan yagona uchrashuv bo'ldi ("Bolonya"ga qarshi o'yin kubokda o'tkazilgan).
Jarohat bilan o'ynash tavakkal qaror edi: U maydonga tushib, jamoadoshlariga ishonch bag'ishlashi mumkin, ammo jarohatini og'irlashtirib olishi ham mumkin edi. Andrea aqlli futbolchi bo'lgani uchun texnikasi evaziga o'yinini o'zgartirdi va tavakkalni minimallashtirishga muvaffaq bo'ldi.
Pirlo quyidagicha o'ynadi:
- Haqiqatdan ham ko'proq chap oyoqda pas berdi. Uning uzatmalari avvalgidek yuqori saviyada qoldi.
- U odatdagidan kamroq himoyaga yordam berdi. Bu yarim himoyachilarning yuklamalarini oshirdi (ayniqsa Arturo Vidalning), ular vazifalarini uddalay olmaganda, bu muvaffaqiyatsizliklarga olib kelardi.
- Videoda esa barchasi yaxshi tahlil qilingan.
| Andrea Pirloning statistikasi | ||
|---|---|---|
| CHapaqay Pirlo | 2011/2012 | Jarohatsiz Pirlo |
| 85% | Uzatmalar aniqligi | 87% |
| 83% | Uzun paslar aniqligi | 85% |
| 1,9 | Zarbadan avvalgi paslar | 3,4 |
| o'rtacha 90 daqiqada | ||
Andreaning ko'rsatkichlari umuman o'zgarmaganda g'alati bo'lardi, ammo uzatmalar va uzun paslar aniqligi biroz pasaydi, shunga qaramay top darajada qoldi. Bu zarbalardan oldingi paslar sonidagi o'zgarishlar. Bu erda faqat jarohatni emas, taqvimni ham hisobga olish kerak. Ushbu jihat raqamlarga tasir qildi.
Eng ajoyibi: Hatto jarohatlangan Pirlo qiyin paytda ham to'p nazorati bo'yicha A Seriyaning boshqa tayanch yarim himoyachilaridan yaxshiroq natija ko'rsatgan. Raqiblar orasida hech kim hujumga Pirlodek foyda bermasdi (zarba uchun o'rtacha 1,9ta pas). Aniqlik va uzatmalar soni bo'yicha faqat Daniele De Rossi va Mark Van Bommel raqobatchi bo'ldi, ammo ularda jarohatlar kuzatilmagandi.
Bosh sahifaga
217