Adnan Oraxovac: "Maydonda borimizni beramiz"

"SHerlar" ayni paytda tig'iz taqvim ostida o'yinlar o'tkazishmoqda. Qo'qonliklar bilan bellashuvga tayyorgarlik xususida Adnan quyidagicha javob qaytardi:

- Har bir bahsga imkoni boricha jiddiy yondoshamiz. CHunki hech bir bellashuv oson o'tmaydi. Biz raqibning turli harakatlari tushirilgan lavhalarni tomosha qildik. SHu asosda ularning o'ziga xos jihatlarini bilib boryapmiz. Mashg'ulotlarga barcha masuliyat bilan qaraydi.

"Qo'qon-1912" jamoasi to'g'risida nimalarni bilishi haqida berilgan savolga Oraxovacning javobi shunday bo'ldi:
- Bu jamoaga qarshi o'tgan yili ikki marta o'ynadik. Safardagi bellashuvda ular bizga etarlicha muammo tug'dirishgan va durang qayd etgandik. Toshkentda esa bu jamoani taslim etganmiz. Raqib tarkibida bir qator yangi futbolchilar va murabbiy borligini yaxshi bilamiz. Har bir murabbiy o'zi maqul bilgan o'yin uslubini yuzaga keltirishga intiladi. Bu jamoa bor imkoniyati bilan o'ynashiga shubha yo'q. O'z navbatida biz ham g'alaba qozonish uchun maydonda borimizni beramiz. Keskin kechadigan bahsga tayyormiz.

"Paxtakor" va "Qo'qon-1912" jamoalari o'rtasidagi uchrashuv 11 mart, juma kuni soat 17:30da "Paxtakor" stadionida boshlanishini eslatib o'tamiz.

"Paxtakor" matbuot xizmati