Loyiha mehmoni bo'lgan O'FA birinchi vice-prezidenti Ravshan Ermatov karantin paytida ish qanday ketayotgani borasida o'z fikrlari bilan o'rtoqlashdi.
- Avvalambor hammaga Assalomu Alaykum! Muhtaram Prezidentimiz SHavkat Miromonovich Mirziyoev aytib o'tganlaridek, shu kunlarda xalqimiz sinovli kunlarni boshdan kechiryapti. Futbol jamoatchiligi ham bir-birini qo'llagan holda birdam bo'lib ish olib borishga harakat qilyapmiz.
- Sinovli kunlarda O'FA va PFL xodimlari - barchamiz karantin qoidalariga amal qilgan holda masofadan turib onlayn rejimda ishlayapmiz. Endi bu ham yurtga kelgan "to'y", hammamiz karantin qoidalariga to'liq amal qilib uyda qolishda davom etsak, o'ylaymanki, koronavirus balosi tez orada bartaraf etiladi.
- Oldimizga katta maqsadlar qo'yilgan, shu bois masofadan turib ham ishni davom ettirmasak bo'lmaydi. CHunki karantin davri ortda qolib yana ishga sho'ng'ib ketadigan bo'lsak, bu holat barchaga qiyinchilik tug'dirishi mumkin.
- Har kuni tashkilotimiz xodimlari, bo'limlar mutaxassislari bilan gaplashib o'zaro fikr almashyapmiz hamda kelajakka doir rejalar tuzyapmiz. To'g'ri, bugungi kunga kelib ko'p rejalar o'zgarib ketdi. SHu bois ishlarni boshqatdan ko'rib chiqyapmiz. Agar may oyidan yana ish davom etadigan bo'lsa, mavsumning buyog'i qanday kechadi, nimalar qilishimiz lozim bo'ladi, shu haqda bosh qotiryapmiz. Xullas har qanday holatga tayyor turishimiz kerak.
- Terma jamoalar bosh murabbiylariga tegishli ko'rsatmalarni berganmiz va ular masofadan turib nomzod futbolchilar bilan ish olib borishyapti. Barcha futbolchilarga uyda mashg'ulot o'tkazish dasturlari belgilab berilgan va shu asosda karantin paytida uyda mashq qilishyapti. Hozir oldimizda bundan boshqa yo'l yo'q, toki vaziyat o'nglangunga qadar shunday yo'sinda ishlab turamiz. Bu o'rinda O'FA terma jamoalar bo'limi boshlig'i Azizbek Haydarov bilan har kuni muloqotdamiz, - deydi Ravshan Sayfiddinovich.
Bosh sahifaga
843