Dastlab “Lokomotiv” va “Nasaf” maydoniga safar qilingan bo'lsa, uchinchi turga kelibgina o'z maydonida “Navbahor”ni qabul qildi. Mana shu uchrashuvlarda “burgutlar” qoniqarsiz natijalar qayd etishdi. Yakunda bosh murabbiy Aleksandr Xomyakov istefoga chiqdi. Biz bu borada bir necha yildan beri jamoada harakat qilib kelayotgan iqtidorli futbolchi Farhod Bekmurodovning fikrlari bilan qiziqdik.
“O'yin tomonidan uchta turda ham muxlislarga ham manzur keldik. 2014 yildan beri shu jamoada o'ynayotgan bo'lsam bunchalik sifatli futbol ko'rsatganimizni oldin eslay olmayman.
Safarda kuchli jamoalarga munosib kurash taqdim qildik. Ushbu bahslarda g'alaba qozonmagan bo'lsakda maydondan ko'pchilikning olqishi ostida chiqib ketdik. Xomyakovning ketishi nimaga bog'liq? Taktik jihatdan mazkur mutaxassis davriga kelib ancha shakllandik. Lekin, chiroyli o'yin natijma bermaydi.
Barcha javobgarlikni bo'yniga oldi va mardlarcha ish tutdi. Bu uning qarori, murabbiy qarorini hurmat qilishimiz kerak. Bundan buyon endi Superliga davom ettirilsa ishqibozlarimizni, rahbarlarimizni xursand qilish uchun o'ynaymiz. Aleksandr Andreevich mashg'ulotlarda ko'proq taktikaga urg'u berardi, o'rgatgan narsalarini talab qilardi. Karantinda hamma qatori oilam davrasida va murabbiylarning ko'rsatmalarini bajarib, individual tarzda mashqlarni bajarmoqdaman.
Faoliyatim davomida poytaxt grandi “Lokomotiv” jamoasida o'ynash baxti nasib qildi. Tan olaman raqobatda yutqazdim. Menga imkoniyat bergan Andrey Fyodorovga rahmat aytib qolaman. O'zimga yarasha tajriba to'pladim.
Jamoaga kelgan legionerlar bilan chiqishib ketdik. Ibe Mishel yaxshi taassurot qoldirdi. SHuningdek, Emmanuel ham chakki emas. Zozulya va Litvyakov birinchi turlardan boshlab yordam berishga intildi. Fursatdan foydalanib barchani birlashishga va hamjihatlikka chaqirib qolaman. Birgalikda koronavirusni engamiz”,- dedi Bekmurotov.
Abdulaziz Iskandarov yozib oldi
Bosh sahifaga
569