"Olmaliq": Ikkilar haqida

O'yindan avval, sizlarga bu bahs bosh hakami "Olmaliq" ishtirokida 22-o'yinni boshqarishini va o'zining 222-o'yinini o'tkazishini yozgandik. Raqamlar o'xshashligi bu turda jamoamiz faoliyatida ham qayd etildi. "Olmaliq" "Nasaf"ga qarshi o'yinda oliy ligadagi 222-uchrashuvini o'tkazdi.

Jamoa o'z tarixida ikkinchi marta mavsumni ketma-ket ikki mag'lubiyat bilan boshladi. Birinchisi 2010 yilda kuzatilgandi. O'shanda jamoamiz safarda "Andijon"ga 2:3 va "Neftchi"ga 0:3 hisobida mag'lub bo'lgan. Qarshiliklar bilan o'yinga qadar jamoamizning o'z maydonidagi mag'lubiyatlari 22ta edi. Ikkinchi marta "Nasaf" Olmaliqda ikki to'p farqi bilan zafar quchdi. Xuddi shuningdek, Vladislav Ceytlin bosh hakamligida jamoamiz ikkinchi marta o'z maydonida mag'lub bo'ldi. Darvoqe, Ceytlin boshqargan o'yinlarda "Nasaf"ning mag'lubiyatsiz seriyasi davom etadi. Nasafchilar oxirgi marta 2013 yil 8 martda "Bunyodkor"ga yirik hisobda mag'lub bo'lishgan. Olmaliqdagi o'yinni hisobga olganda "Nasaf" 9-o'yinda ijobiy natijaga erishdi. 9 o'yindan 8tasi g'alaba va yana bittasi durangdan iborat.