Qoraqalpoq futbolining yorqin vakilining millionlar o'yiniga oshno tutunishi haqida u o'z intervyularida shunday degan edi: “Futbolga qiziqishimga amakim Nematilla Qutiboev sabab bo'lgan. Ularning o'yinlarini ko'rib futbolga mehr qo'yganman. O'zim yuridik universitetini tamomlaganman. Kim bilsin, futbolchi bo'lmaganimda shu sohani egasi bo'lardim”.
Dastlabki jamoasi mahalliy “Jayxun” bo'lib, aynan shu klub orqali katta futbolga qadam qo'yishni boshlagan. 2009 yilda Muborakning “Mashal” jamoasi uni o'z safiga qo'shib oladi va mahoratini, tajribasini oshirib borishiga katta hissa qo'shadi. 2010-2014 yillar oralig'ida ushbu jamoa sharafini himoya qilib muxlislar etirofiga sazovor bo'ladi. U o'zining Oliy ligada “Neftchi” darvozasini ilk bor ishg'ol qilib gollari hisobini ochishga muvaffaq bo'ladi. 2014 yilning ikkinchi yarimida Davron Fayziev murabbiyligidagi “Sug'diyona”ga yo'l olib jamoa bilan kuchlilar safida qolishni uddasidan chiqadi.
2015 yilgi mavsumni Igor SHkvirin boshchiligidagi “Olmaliq” jamoasida 26 uchrashuvda maydonga tushib 5 bor o'z hisobiga gol yozdirib qo'yadi. Markazda va tayanch yarim himoyasida barqaror o'yin namoyish qiladigan futbolchining xizmatlariga keyingi yil “Buxoro” jamoasi qiziqish bildiradi. Esingizda bo'lsa, 2016 yilgi mavsumni ko'hna shahar jamoasi ajoyib tarzda o'tkazib kuchli to'rtlikdan joy olgandi.
Mazkur klubdagi o'yinlari sabab u Samvel Babayanning nazariga tushadi va milliy terma jamoamizning iyun oyidagi yig'iniga chaqiriladi. Buni qarangki, uning debyuti okean orti vakili Kanadaga qarshi o'rtoqlik uchrashuviga to'g'ri kelgandi. Salamat 2016-2017 yillar oralig'ida muntazam ravishda terma jamoaning turli yig'inlariga jalb etilib kelindi. Biroq, ko'pincha u o'yinlarni zaxirada o'tirib tomosha qilishiga to'g'ri keldi. SHunga qaramay Babayan Qutiboevga uch marotaba imkoniyat berdi. SHundan so'ng u Burkina-Faso va Gruziya termalari bilan o'yinlarda ham ikkinchi bo'limda maydonga tushdi. Etiborli jihati Salamat 3 ta bellashuvni 3 ta qita vakiliga qarshi o'tkazdi va Osiyo jamoalari bilan o'yinlarda maydonga tushmadi.
O'zini ko'rsatayotgan yarim himoyachi 2017 yilning boshida o'z oldiga yuqori maqsadlarni qo'ygan, OCHL guruh bosqichida ishtirok etayotgan “Lokomotiv” jamoasiga kelib qo'shiladi. “Al Taavon”ga (0:1) qarshi bahsda CHempionlar Ligasidagi debyutini o'tkazdi. Ikkinchi turda esa BAAning “Al Ahli” jamoasi bilan o'yinda 17-soniyadayoq hisobni ochdi. Qaysidir manoda u faoliyatida yangi sahifa ochayotgandi. Ammo, kutilmaganda ikkinchi davrada Ulug'bek Baqoev boshqarayotgan “Buxoro”ga qaytishga qaror qildi. O'tgan mavsumda esa klubni elitada qolishida katta hajmdagi ishni bajardi. Joriy yildan boshlab esa “Metallurg”da harakat qilib kelmoqda.
Saytimiz ijodkorlari nomidan Salamat Quttiboevga sog'lik va salomatlik, faoliyatida ulkan zafarlar tilab qolamiz.
Bosh sahifaga
1402