Aslida bosh direktormi yoki bosh direktor vazifasini bajaruvchimi, hozirgi sharoitda buning farqi yo'q. CHunki hozir barchaning o'y-xayoli bitta narsaga qaratilgan: karantindan keyin futbolimiz qanday holatda bo'ladi? Va bu borada ko'pchilik lavozim darajasi bilan qiziqayotgani yo'q.
Biz nima sababdan avvalgi rahbar Davron SHoqurbonov ishdan bo'shaganini bilmaymiz. Bu haqda PFL rasmiy bayonot bermadi. PFL faqat bosh direktor vazifasini bajaruvchi etib Diyor Imomxo'jaev tayinlanganini elon qildi.
Ayni paytda PFL bosh direktorligiga Diyordan yaxshi nomzod yo'q edi. Ha, u katta futbol o'ynamagan (bir xil mutaxassislar shunday deyishni yaxshi ko'radi: sen o'zi futbol o'ynaganmisan?) Bu bilan sen futbolda nimani ham tushunarding demoqchi bo'lishadi shekilli.
Lekin Diyor Imomxo'jaev o'qigan, tushungan yigit. U baribir futbol ichidan chiqdi, bir dumalab chetdan kelib qolgani yo'q. U PFLda ikkita rahbar bilan ishlashga ulgurdi. Ko'p tajriba to'pladi. Hujjat va qog'oz bilan ishlashni o'rgandi.
Diyor Imomxo'jaevning menga yoqadigan eng yaxshi xislati bu - to'g'riso'zligi va miyasiga nima kelsa shuni aytishi. Uning fikri to'g'ri yo noto'g'ri, bu ikkinchi masala, muhimi o'zining mustaqil fikri bor va shuni doim baralla aytib kelgan. Diyor Imomxo'jaev bu lavozimga tanish-bilish orqali emas, balki o'z mehnati sabab erishdi. Uning futbolda "tankasi" yo'q deb o'ylayman. "Tankasi" bor bo'lsa ham bu - uning fikrlashi va qo'lidan keladigan ishni bajarishi.
Diyor qiyin vaziyatda boshqaruvni qo'lga oldi. Karantindan keyin qay yo'sinda davom etishimizni belgilab olish oson bo'lmaydi. Umuman bundan keyingi futbol qanday holatda bo'lishi mavhum. Koronavirus balosi juda ko'p sohalarni to'xtatib qo'ydi. Bu baloni ildizi bilan yo'qotmay turib futbol yana avvalgi darajasiga qaytishiga ishonish qiyin.
Hozirgi sharoitda Diyor Imomxo'jaev oldida karantindan keyingi Superliga, Proliga va boshqa ichki musobaqalarni qay tarzda davom ettirish birlamchi vazifa bo'lib turibdi. CHunki qanday bo'lmasin chempionatni davom ettirib qo'yish kerak. O'ylaymizki, uning oldida bir nechta variantlar yo'q emas.
Diyor Imomxo'jaevni qo'llaydigan birinchi navbatda bu - klublar. SHu bois qandaydir qaror chiqarishdan oldin klublar taklifini o'rgansa va atrofdagilarning o'rinli maslahatiga quloq solsa, o'ylaymanki, uning ishlari besh bo'ladi. Faqat buning uchun birinchi navbatda hamma klubni birdek ko'rib bamaslahat ish yuritishi shart.
Yangi lavozim va yangi masuliyatli ishda unga omad tilab qolaman.
X.Xoliqov.
Bosh sahifaga
633