- Ikki oydan oshiqroq davom etgan karantindan keyin ikkinchi sinov-nazorat o'yinida maydonga tushdik. Bu Superliga 4-turiga tayyorgarlik doirasida so'nggi o'yin bo'ldi. «Surxon» - yaxshi shakllangan jamoa. O'yin qiyin kechdi, boshida 2ta gol urib oldik. SHundan keyin 10 daqiqacha qiynaldik. Ammo ko'p o'tmay tizgin yana qo'limizga o'tdi.
- Murabbiy bugun sizni asosiy tarkibga qo'ydi. Hissiyot boshqacha bo'ldimi?
- Ha, shunday. CHunki jamoaga kelganimdan beri ilk marta asosiy tarkibda maydonga tushdim. Garchi o'rtoqlik o'yini bo'lsada, «Lokomotiv» tarkibida o'ynash bosim yuklaydi.
- Karantindan keyin jamoaning holati qanday? 15 iyun kuni birdaniga o'ynab ketish qiyin bo'lmaydimi?
- To'g'ri, qiyin bo'ladi, lekin mashg'ulotlarda astoydil ishlab tayyor bo'lib olishga harakat qilyapmiz. CHempionat boshlanganda kim qanday holatda ekanligi ko'rinadi. Xudo xohlasa, biz mavsumning davomiga tayyormiz deb o'ylayman.
- Bugungi o'yin qanchalik og'ir o'tdi?
- Ikkita gol urgan bo'lsakda, raqib bizga etarlicha qarshilik ko'rsatdi. CHempionlikni maqsad qilib qo'yganimiz uchun barcha o'yinlarda yutishga harakat qilyapmiz.
- O'z o'yiningizni qanday baholaysiz?
- Boshida hayajondan chiqib ketish biroz qiyin bo'ldi. Ammo jamoaga moslashib ketishimga ishonaman. Bugun o'z o'yinimni ko'rsata oldim deb o'ylayman.
- Rasmiy uchrashuvlarda asosiy tarkibga kirish imkoniyati qanday?
- Asosiy tarkibga kirish uchun hammada imkoniyat bor. Jamoamizda yoshning ahamiyati yo'q. Kim mashg'ulotlarda o'zini ko'rsatsa, murabbiy unga ishonch bildiradi va asosiy tarkibga qo'yadi.
Bosh sahifaga
354