Uchrashuvda ko'plab vaziyatlar yaratgan Mirjalol Qosimov shogirdlari Elguja Grigalashvilining yagona goli evaziga g'alabani qo'lga kiritdi. Ushbu bellashuvdan so'ng jamoaning tajribali hujumchisi Zafar Polvonovning fikrlariga quloq tutdik.
“Qisqa qilib aytganda og'ir o'yin bo'ldi. Karantindan so'ng kirishib olish oson bo'lmaydi. Menimcha, bugun ikki jamoa ham qiynaldi. Lekin, biz birinchi bo'lib gol urdik. Bitta to'p o'yin masalasini hal qildi. Hali ko'p ishlashimiz, kamchiliklar va xatolarni kamaytirishimiz kerak. Baribir uch oy muddat davomida dam olganimiz o'yin davomida bilindi. Bugun maydonda g'alaba uchun borini bergan jamoadoshlarimga rahmat aytib qolaman. “Qizilqum” ustidan qozonilgan g'alabani tezda unutib “Surxon”ga qarshi uchrashuvga jiddiy tayyorgarlik ko'ramiz. Navoiy shahri jamoasiga keyingi bahslarda omad tilab qolaman, ular ham o'zlarini ko'rsatishlari shubhasiz.
Raqibga qaraganda sport formamiz yaxshiroq ko'rindi? Ha, to'g'ri. Murabbiyimiz Mirjalol Qosimov futbolchilarni jismoniy jihatdan qanday tayyorlashni juda yaxshi biladilar.
Bu o'yinimizni eng yaxshisi deyishga hali erta. Zero, biz bundan ham ko'prog'iga qodirmiz. Futbolimiz tarixida bu qadar majburan uzoq tanaffus bo'lmagandi. To'liq moslashib olishimizga vaqt kerak. Boshqa jamoalar ham yutqazish uchun harakat qilmasligi aniq. SHuning uchun hozirlikni yanada jiddiy tarzda olib boramiz va murabbiylarning ishonchini oqlashga harakat qilamiz”,- deydi Zafar Polvonov.
Bosh sahifaga
914