Temur Kapadze: “Yurtimizda o'tkaziladigan Osiyo chempionatida g'olib chiqib ishqibozlarga quvonch ulashmoqchimiz”

Terma jamoa bosh murabbiyi Temur Kapadze poytaxtda o'tkazilayotgan yig'in hususida O'FA rasmiy saytiga intervyu berdi.

“Karantin tufayli nafaqat biz, balki, boshqa yoshdagi terma jamoalar ham rejalariga o'zgartirish kiritdi. Koronavirus xorijdagi yig'inlarimizga, xalqaro o'rtoqlik uchrashuvlarimizga to'sqinlik qildi. Yangidan reja tuzib chiqdik. Bilasiz, Osiyo chempionati O'zbekistonda o'tkaziladi. Turnirgacha vaqt kam qolgan. Futbolchilar deyarli uch oy mashg'ulotlar va yig'inlarda qatnashmadi. SHunga qaramasdan bir hafta oldin poytaxtda yig'inni boshladik. O'zimizda bo'lib o'tadigan qita musobaqasiga qadar yaxshi tayyorgarlik olib borib, munosib harakat qilgan holda chempionlikni qo'lga kiritib ishqibozlarga quvonch ulashmoqchimiz. Yil boshida tuzgan rejalarimiz o'zgardi. CHunki, ko'p o'rtoqlik uchrashuvlari bekor qilindi. Hozirgi sharoitda chetga chiqishni iloji yo'q, xorij jamoalarida ham bu erga kela olmaydi. SHuning uchun o'zimizni mahalliy klublarimizga qarshi o'rtoqlik o'yinlarida maydonga tushamiz. Avgust va sentyabr oylarida xalqaro turnirlarga taklif qilishgan. Biroq, u ham aniq emas. Maqul kelsa buni amalga oshirishimiz mumkin. Biz uchun har bir musobaqaning ahamiyati yuqori. Osiyo chempionati uyda bo'ladi. SHu bois faqat chempionlik va sovrinli o'rinlar uchun harakat qilamiz.

Faoliyatim davomida orttirgan tajribam menga katta yordam bermoqda. Milliy terma jamoada ko'p o'yinlar o'tkazganman. Ushbu tajribamdan kelib chiqib ko'rsatmalar bermoqdaman. Bollarimiz ko'z tegmasin yaxshi. Ularni har tomonlama tayyorlashga harakat qilamiz. Bizda texnik tomondan kuchli futbolchilar bor. Ayta olamanki, hujumkor o'yin ko'rsata olamiz. Albatta, birinchi galda barcha chiziqlarda balans bo'lishi lozim. Qaerda himoyalanish kerak, qaerda hujum qilishimiz kerak, bularning barchasini tahlil qilib chiqamiz. 

Jasur Jaloliddinovning hozirgi holati quvontirmoqda. Uni “Bunyodkor”dagi o'yinlarini kuzatib boryapmiz. SHuningdek, Hojimat Erkinovni ham holati yaxshi. Bunday futbolchilar qancha ko'p bo'lsa terma jamoamiz uchun shuncha foydali bo'ladi”,- deydi Temur Kapadze.