Abdumalik Hakimov: “Quvasoyda “Navbahor” bilan tomoshabop o'yin bo'ladi”

Bo'lajak uchrashuv oldidan mezbonlar ustozi Abdumalik Hakimovdan intervyu oldik.

- Boshqaruvingizdagi “Cementchi” jamoasi bu yil hisobidan ilk rasmiy o'yinini oliy liga vakili “Navbahor”ga qarshi o'tkazadi. Aytingchi bo'lajak uchrashuvga tayyorgarlik jarayoni qanday ketmoqda?
- Garchi shanba kungi raqibimiz oliy liga jamoasi bo'lsada, o'yinga bo'lgan tayyorgarlik odatdagidek kechmoqda deyish mumkin. Har bir raqibga xurmat bilan qaragan xolda, odatdagidek hozirlik ko'riladi. O'ylaymanki Quvasoyda “Navbahor” bilan o'yin tomoshabop ruh ostida kechadi.  

- Namanganliklarning so'nggi uchrashuvini kuzatgan bo'lsangiz kerak?
- Albatta, “Navbahor”ning Farg'onada “Neftchi” bilan o'tkazgan uchrashuvini bevosita stadiondan turib kuzatib bordik. SHundan so'ng o'zimizga yarasha xulosaga ega bo'ldik. Raqib kuchli. Tarkibida mahoratli futbolchilar jamlangan. O'yin borasida ham ular yomon taassurot qoldirmadi.

- Quvasoylik muxlislar qarshisida o'ynaysizlar. Yigitlarni ruhlantirish qanday kechmoqda?
- Umid qilamanki futbolchilarim uyaltirib qo'ymaydi va shu kuni stadionga kelgan muxlislarni va rahbariyatni xursand qilishadi.

- O'yin oldidan muammo yo'qmi?
- Birgina himoyachi Azamat Abdullaevda jaroxat bor. Qolgan futbolchilar esa o'yinga tayyor.

- O'tgan yili Kubok bahsida “Olmaliq”ni mag'lub etib, o'ziga yarasha shov-shuv uyg'otgandinglar. Bu yil ham “Cementchi”dan mana shunday sensaciya kutsak bo'ladimi?
- Albatta. Menimcha har bir jamoa maydonga faqat g'alaba uchun chiqadi. SHu jumladan “Cementchi” ham Kubok bahslarida imkon qadar uzoqroqqa borishni istaydi. Qolganini esa vaqt ko'rsatadi.

- Jamoangizning yangi mavsumga tayyorgalik ishlaridan qoniqish xosil qildingizmi?
- Biz ishlab chiqqan rejamizdagi barcha yumushlarni amalga oshira oldik. Asosan o'z qarorgohimizda yig'in o'tkazdik. Bu orada ko'plab nazorat uchrashuvlarida va Farg'ona hokim kubogi turnirida ishtirok etdik.

- Selekciya ishlaridan ko'nglingiz to'ldimi?
- Ha, selekciya ishlarini yakunladik. Safimizni kuchaytirish mumkin bo'lgan yigitlarni qo'shib oldik. Endi asosiy etibor jamoaviy o'yinni shakllantirishga qaratiladi.

- Tarkibdagi o'zgarishlar borasida bizga sizdan boshqa hech kim aniq malumot bera olmasa kerak. SHu bois bu borada o'zingiz to'xtalib o'tsangiz maqsadga muvofiq bo'lardi.
- Tarkibda etiborga molik o'zgarishlar yuz berganini aytishim joiz. Dastlab o'tgan mavsum “Cementchi” sharafini himoya qilgan va bu yil boshqa jamoaga o'tib ketganlarga to'xtalib o'tsam. To'rt nafar asosiy o'yinchilarimiz oliy liga klublari safiga borib qo'shildi. Bular – Farruh Turdaliev “SHo'rtan”ga, Elyor Akbarov bilan Nodirxon Kamolov “Qizilqum”ga, Azizxon Ibragimov esa “Qo'qon-1912” bilan shartnoma imzoladi. “Neftchi”dan ijara asosida kelgan Jahongir Dadaboev esa birinchi liga vakili “UzDongJu”ga ketdi. Endi safimizga kelib qo'shilganlarga to'xtalsam. Darvozabonlar Eldor Isaboev bilan Ilhom Jumanov, himoyachilar Oqiljon Mahmudov, Aziz Matkarimov, Azamat Abdullaev, yarim himoyachilar SHukur Jumaboev, Muhammadsulton Fozilov, Sardor Sotvoldiev, hujumchilar – Abdurazzoq Jo'raev, Nurlibek Talasboev. SHuningdek yana bir qator mahalliy yosh futbolchilarni safimizga qo'shib oldik. O'ylaymanki transfer oynasida foydali xaridlarni amalga oshirdik.   

- O'tgan mavsum bir nechta futbolchilarni ijara asosida olgandinglar. Bu yil ham shunday xolat takrorlandimi?
- Yo'q, bu yil hech bir futbolchini ijaraga olmadik.

Islombek Rustambekov suhbatlashdi.