Asror Aliqulov: "Kelishilgan o'yinlar" ishlashni yoqtirmaydigan murabbiylar uchun qo'l kelmoqda"

- SHu yoshda ham maydonga tushayotganimning asosiy sababi - mashg'ulot. Mashg'ulotlarda ishlash orqali jismoniy holatimni ushlab turibman. "SHo'rtan" jamoasida hozirgi kunda markaziy himoyasida biroz muammo borligi tufayli futbol o'ynashda davom etyapman. Futbolchi hech qachon mehnatdan qochmasligi kerak. Mashg'ulotlarda qanchalik zo'r berib ishlasa, maydonda aksincha osonroq bo'ladi. Hozirgi kunda kelib ham to'p tepayotganimning asosiy siri - mehnat desam bo'ladi.

Kelishilgan o'yinlar? Bu birinchi navbatda bu futbolni o'sishiga qarshilik qiladi. Ikkinchidan esa bu menimcha, ishlashni xohlamaydigan murabbiylar uchun qo'l kelsa kerak. Jamoani o'yinini shakllantirolmaydigan, erinchoq murabbiylar faqatgina kelishilgan o'yinlar orqali qaysidir tomonlama o'zining kuchsiz tomonlarini yopish maqsadida shu ishga qo'l uradi deb o'ylayman. Lekin bu narsa vaqtinchalik. CHunki hozir kelishilgan o'yinlarga qarshi kurash olib borilmoqda. O'sib kelayotgan yosh istedodlarning yo'qolib qolishiga ham shu kelishilgan o'yinlar sabab bo'lmoqda. Umuman bu narsa futbolni cho'ktiradi. Bizda shu kelishilgan o'yinlarda ishtirok etadigan, ishlashni istamaydigan murabbiylar bor. Afsuski bu kabi o'yinlar uchrab turibdi. Lekin yildan-yilga sezilarli darajada kamayib bormoqda. Bu borada katta ko'lamdagi ishlar olib borilmoqda. Agarda tez orada shu kabi o'yinlar yanada kamaysa, stadionga ancha muxlislar qaytadi.

"SHo'rtan" jamoasi o'z oldiga aniq bir vazifa qo'ymagan. "SHo'rtan"da oxirgi yillarda mahalliy yoshlarga etibor bo'lmagan. SHu bois hozirgi kunda tarkibda yuqori darajada o'ynay oladigan futbolchilar juda kamayib ketdi. Bu yildan etiboran jamoamiz asosan bor etiborini futbol maktabimizdan chiqib kelayotgan yoshlarga qaratadi. Ularga imkon beriladi. "SHo'rtan"ning asosiy maqsadi o'z tarbiyalanuvchilariga etiborni kuchaytirib, kelajakda istedodli yoshlarni chiqarish. "SHo'rtan" asta-sekin o'z o'yinini kuchaytirib boradi. Tarkibda ko'plab o'zgarishlar ruy bergan. Rahbariyat jamoa oldiga malum bir o'rinni egallashni vazifa qilib qo'ymagan. Maqsadimiz har bir o'yinga g'alaba ishtiyoqida maydonga tushish va muxlislarni quvontirish.

SHahboz Beg'amov suhbatlashdi.