Mamlakatimizning amaldagi chempioni "Paxtakor" o'z maydonida "Bunyodkor"ni qabul qiladi. Turnir jadvalida yonma-yon o'rinlarda borayotgan jamoalarning o'zaro to'qnashuvi. Har ikki jamoa dastlabki to'rtta turdan so'ng bir xil 9 ochkodan jamg'argan. SHuningdek, har ikki klub hisobida uchtadan g'alaba bor.
Joriy mavsumni g'alaba bilan boshlagan "Paxtakor" dastlabki uch turda qatorasiga g'alabaga erishdi. SHota Arveladze shogirdlari navbati bilan "Navbahor" (2:1), "Buxoro" (3:0) va "Metallurg" (4:1) klublaridan ustun kelishdi. Karantindan so'ng jamoa ilk o'yinini safarda "So'g'diyona"ga qarshi o'tkazib, 0:1 hisobida imkoniyatni boy berdi.
"Bunyodkor" esa bu yilgi chempionatni ketma-ket ikkita g'alaba bilan boshladi. Vadim Abramov shogirdlari ilk turda "Surxon"ni (3:1) mag'lub etib qaytishdi. So'ngra "Mashal"dan kichik hisobda (1:0) ustun kelishdi. Lekin 3-turni Olmaliqda o'tkazgan "qaldirg'ochlar" 0:2 hisobida mag'lub bo'lishdi. O'tgan turda jamoa yana g'alaba qozonishning uddasida chiqdi. Bu safar "Qo'qon-1912" 1:0 hisobida mag'lub etildi.
Bugungi o'yinda "Paxtakor"ning imkoniyatlari yuqori baholanmoqda. Jamoa birinchidan o'z maydonida o'ynaydi, ikkinchidan Jizzaxdagi mag'lubiyat tasodif ekanligini isbotlashga harakat qiladi.
"Bunyodkor" esa o'tgan yil "Paxtakor"ni mag'lub etishning uddasidan chiqqandi. Jamoa bu yil ham bu ishni uddalay oladimi? Buni o'yin yakunida bilib olamiz.
P.S. Soat 20:00da boshlanadigan o'yinni "Sport" telekanalida to'g'ridan to'g'ri kuzatib boring.
 Paxtakor | Superliga. 5-tur 19/06/2020, 20:00 - : - Boshlanmadi |  Bunyodkor |
Bosh sahifaga
327