Islom Isoqjonov: "Sovrinli o'rinlar uchun hozirgi harakatlarimiz kamlik qiladi"

Bellashuvda mehmonlar darvozasiga ikki bor yo'l topa olgan "lochinlar" muhim uch ochkoga ega chiqdi. Bahsdan so'ng "Navbahor" futbolchisi Islom Isoqjonov fikrlarini bildirib o'tdi.

"G'alaba qozongan bo'lsakda oson o'yin o'tkazmadik. Hisobni ochganimizdan so'ng biroz xotirjamlikka berildik. Muhimi g'alaba va uch ochko. Superligada har bir qo'lga kiritilgan ochkoning qadri baland. Albatta, avvallari stadionimiz to'lib toshardi. Endilikda shunday sharoitga ko'nikishdan boshqa choramiz yo'q. Muxlislarning yo'qligi sezildi. Xozirda hamma jamoalarning holati tenglashgan. Bundan foydalanib qolishimiz kerak. Vaziyatdan kelib chiqib yanada kuchliroq va ishonchliroq to'p tepishimiz lozim. 

Oldimizga OCHLga yo'llanmani qo'lga kiritish vazifasi qo'yilgan. Buning uchun har bir uchrashuvda jamoa bo'lib bir yoqadan bosh chiqarishimiz talab etiladi. Jamoamizda barchasi joyida va rejadagidek ketmoqda. Ammo, bu xotirjamlikka berilamiz degani emas. Hozirgi harakatlarimiz sovrinli o'rinlarga ega chiqishimiz uchun kamlik qiladi",- deydi Islom Isoqjonov.