U bilan bog'lanib bir qator masalalar bo'yicha savollar berdik.
"O'z vaqtida O'zbekistonda 4 yil o'ynaganman", - deb gap boshladi Igor Petkovich. Bu mamlakatda ajoyib insonlar yashashadi, ko'plab do'stlarim, yaqinlarim bor O'zbekistonda. Hozirgi kunda O'zbekiston chempionatida o'ynayotgan barcha serbiyalik futbolchilar mening mijozlarim hisoblanadi. Anchadan buyon ularning huquqlarini himoya qilib kelayapman. Afsuski hozir gapirib beradigan holat ijobiy emas...
- Aniqroq aytsangiz qanday holat?
- Termizning "Surxon" klubida ikki nafar mijozim Vladimir Bubanya va Darko Stanoevich to'p tepmoqda. Hozir yilning yarmiga keldik, biroq klub futbolchilarga 6 oy davomida faqat bir marta to'liq maosh berdi xolos. Tushunaman butun dunyoda pandemiya davom etmoqda, vaziyat og'ir. Ammo futbolchilar ham odam ular ham yashashi kerak-ku. Karantin vaqtida Vladimir va Darko O'zbekistonda qolishdi, afsuski klub ularga hatto ovqat uchun ham pul bergani yo'q. O'zbekiston oliy ligasida ishtirok etuvchi klub uchun bu yarashmaydigan holat deb o'ylayman. Klubning futbolchilarga o'tgan yildagi qarzlari ham bor.
- Agar klubning o'tgan yildan qarzlari bor bo'lsa nima uchun futbolchilar yana shu klubda qolishdi?
- Aslida qishda Bubanyaga ham, Stanoevichga ham ko'plab takliflar bo'lgandi. O'zbekistonning o'zidan ham chorlovlar bo'ldi. Ammo "Surxon" klubi murabbiylari va rahbariyat bilan gaplashgach, ularga ishonib shartnomani uzaytirgandik. Afsuski vaziyat o'tgan yildagidan 3 baravar yomonlashib ketdi deya olaman. Bugungi kunda "Surxon"da muhit yaxshi emas, muhit yomon bo'lsa natija ham bo'lmaydi. Klubning so'nggi natijalariga qarasangiz bunga o'zingiz ham ishonch hosil qilasiz.
Ammo O'zbekiston klublari bilan yaxshi munosabatdaman, balki bu intervyudan keyin barchasi yaxshi bo'lar va eng so'nggi chora FIFAga arz qilishgacha etib bormaydi.
- "Surxon"ning natijalari faqat ichki muhit bilan bog'liq deb o'ylaysizmi?
- "Surxon"da selekciya juda yaxshi olib borildi. Qishda jamoaga yaxshi saviyadagi futbolchilar kelib qo'shilishdi. Tarkib zo'r, bu futbolchilar bilan klub kuchli uchlikka kirish uchun kurashishi kerak deb o'ylayman.
- Aprel oyi oxirida "Lokomotiv" himoyachisi Slavko Damyanovich ham yuqoridagi muammolarda qolib ketgani haqida aytgandingiz. Bu masala qanday hal bo'ldi?
- Barchasi hal bo'ldi. "Lokomotiv"ga rahmat, ular tezda aloqaga chiqishdi va barchasini to'g'rilashdi. Hozirgi kunda Slavko bilan hech qanday muammo yo'q.
- "Surxon"da Aleksandr Xomyakov ish boshlagani haqida eshitdik. U bilan birga "Mashal"da ishlagansiz. To'g'rimi?
- Ha Aleksandr Andreevich bilan "Mashal"da ishlaganmiz. U ajoyib inson va ajoyib murabbiy. Biroq menga etib kelgan malumotlarga ko'ra Xomyakov klub rahbariyati bilan kelishuvga erishgan, bir kun mashg'ulot o'tkazgan va ertasi kuni unga "xayr" deyishgan. Menimcha Xomyakov kam ishlash bo'yicha dunyo rekordini o'rnatdi. Bu professional klubning ishi emas.
Serbiyalik futbol agentining aytganlari edi. "Surxon" klubining bu vaziyat borasidagi poziciyasini ham tinglashga tayyor ekanligimizni malum qilamiz. Maqsadimiz qaysidir klubni yomonlash emas muammolarni hal qilishda yordam berish.
Narzulla Saydullaev suhbatlashdi
Bosh sahifaga
209