Legioner sifatida xorijda yurtimiz sharafini munosib himoya qilayotgan, minglab muxlislarning yoqimtoyiga aylangan Rustam Ashurmatov millionlar o'yiniga kirib kelishi haqida shunday hikoya qiladi.
"Futbolga kirib kelishimga birinchi o'rinda tog'am, Baxtiyor Ashurmatov sabab bo'lganlar. Ularning o'yinlarini tomosha qilib futbolga qiziqishim paydo bo'lgan. Bobom xuddi tog'am sinagri futbolchi bo'lishimni istagan va Qo'qondagi "Kimyogar" futbol maktabiga olib borganlar. 6 yoshimdan "millionlar o'yini" sir asrorlarini o'rgana boshlaganman.
"Bunyodkor"ga qanday kelib qolganman? O'sha paytda jamoa nomi "Quruvchi" edi. Klub barcha viloyatlarda yosh futbolchilar ishtirokida turli musobaqalar tashkil etardi. Qo'qondagi musobaqada murabbiylar 20 nafar futbolchini tanlab olishgan va Toshkentga kelganmiz. Poytaxtda 20 nafar futbolchi o'rtasida ham tanlov bo'lgan hamda murabbiylar 3 nafar o'yinchini jamoaga qabul qilishni elon qilishgan. Mana shu uch futbolchi orasida men, Akrom Komilov va Ibrohim G'ofurov bor edi. SHu tariqa poytaxt jamoasiga kelganman".
Uning iqtidorini payqagan va jangchilarga hos harakatlarini ko'ra olgan o'smirlar terma jamoasi bosh murabbiyi Dilshod Nuraliev Rustam Ashurmatovni Erondagi Osiyo chempionati va BAAdagi Jahon chempionatiga olib boradi. Qahramonimiz o'ziga yuklatilgan ishonchni oqlayotgan, terma jamoada Ibrohim Abdullaev bilan ajoyib himoya juftligini hosil qilgandi. Amirliklarda o'tkazilgan o'smirlar o'rtasidagi mundialning birinchi turida Panama darvozasini ishg'ol qiladi. Keyingi yillarda ham u yoshlar terma jamoamizning muhim figuralaridan biriga aylandi. Yoshlar terma jamoamizga ustozlik qilayotgan Ravshan Haydarov Ashurmatovga ishonch bildirishda davom etdi. 2015 yil Yangi Zellandiyadagi Osiyo chempionatidan so'ng O'zbekiston chempionatining ikkinchi davrasida "Bunyodkor" jamoasi asosiy tarkibiga jalb etildi. Tez orada yosh Ashurmatov jamoa mudofaa chizig'ining ishonchli vakiliga aylandi. Bu paytda u 19 yoshda edi. 2016 yilgi mavsumda u "Bunyodkor"ning alishtirib bo'lmas futbolchisi sifatida gavdalandi. O'sha mavsumda u xorvatiyalik Yuritsa Bulyat bilan metin himoya qo'rg'onini hosil qildi. Natijada "Bunyodkor" ushbu mavsumda o'z darvozasidan eng kam to'p olib chiqqan jamoa bo'ldi, 30 ta uchrashuvda 13ta gol o'tkazib yuborish yuqori ko'rsatkich sanalardi. Yakunda esa jamoa bilan birga kumush medallariga ega chiqdi.
2018 yil Xitoyda o'tkazilgan Osiyo chempionatida olimpiya terma jamoasi tarkibida oltin medallarga sazovor bo'ldi. Finalda Vetnam darvozasiga gol urdi. Qaysidir manoda g'alabaga katta hissa qo'shdi deya olamiz.
O'tgan mavsum avvalida faoliyatida ilk bor legioner maqomini oldi va Janubiy Koreyaning "Gvanju" klubiga ko'chib o'tdi. Yangi jamoasiga tezda moslashib olgan Rustam Ashurmatov hozirga qadar jamoasining muhim futbolchisi sifatida to'p tepib kelmoqda.
Saytimiz ijodkorlari nomidan Rustam Ashurmatovga sog'lik va salomatlik, faoliyatida ulkan zafarlar tilab qolamiz!
Bosh sahifaga
1395