Xao Xaydun

1970 yilda tug'ilgan sobiq futbolchi 1992-2004 yillarda Xitoy milliy terma jamoasi sharafini xalqaro maydonlarda himoya qilgan. Faoliyatining asosiy qismi mahalliy "Bai" (1986-96) va "Dalyan Vanda" (1996-05) klublarida o'tdi.

Xitoy futbolining barcha zamonlardagi eng yaxshi hujumchisi, deya etirof etiladigan Xaoning xalqaro maydonlardagi o'yinlari terma jamoaning muvaffaqiyatlariga salmoqli hissa qo'shgan. Jumladan, 2002 yilgi mundial yo'llanmasi qo'lga kiritilishi va 2004 yilgi Osiyo kubogida sovrindorlar qatoridan o'rin olinishida uning xizmatlari beqiyos bo'lgan.

Yuqoridagi suratda Xao bilan to'p uchun kurashayotgan futbolchini tanidingizmi?

Faoliyati oxirlab borayotgan Xaydun 2005 yilda xorijda o'ynash imkoniyatiga ega bo'ldi. U Angliya chempionati 2-divizioni vakili "SHeffild Yunayted" tarkibiga borib qo'shilgandi. Etiborli jihati shundaki, 35 yoshli forvardning transferi futbol tarixidagi rekor summa evaziga amalga oshirilgan - 1 funt. Biroq, 1 funtlik futbolchining "Tumanli Albion"dagi ishlari yurishmadi. U jarohat oldi va asosan klub akademiyasida ishladi."Xitoylik Alan SHirer" 2007 yil futbolchilik faoliyatini yakunladi.

U o'zining chiroyli uzatmalari va gol sezish qobiliyati bilan mashhur edi. Xitoy termasida 107 o'yin o'tkazib, 41 ta gol urgan Xao Xaydun mamlakat bosh jamoasi tarixidagi eng yaxshi to'purar hisoblanadi.

Quyida "Alan SHirer"ning "OCHL-2003"da urgan gollarini tomosha qilishingiz mumkin.

Kunishige Kamamoto

1944 yilda tug'ilgan sobiq futbolchi 1964-77 yillarda Yaponiya terma jamoasi sharafini himoya qilgan. Faoliyati davomida faqat bitta professional klub - "Yanmar Dizel"da o'ynadi. Mazkur jamoadagi 17 yillik faoliyatida 251 ta o'yin o'tkazgan Kamamoto raqiblar darvozasiga 202 bor yo'l topishni uddalagan.

Kunishige to'purarlik borasida Yaponiya terma jamoasi rekordchisi hisoblanadi. "Ko'k samuraylar" tarkibida 76 bahsda maydonga tushgan futbolchi 75 ta golga mualliflik qilgan. U 40 yoshida futbolchilik faoliyatini yakunlagan edi. Ortda qolgan yillar mobaynida Kunishige Kamamotoning natijasiga eng yaqin kelgan Kazuyoshi Miura bo'ldi. Uning hisobida 55 gol bor.

Malumot uchun, bu yil 53 yoshni qarshilagan Miura katta futboldagi faoliyatini hamon davom ettirmoqda. Balki, keyingi gal aynan u haqida material tayyorlarmiz.  Sizda ham takliflar bo'lsa, marhamat yozib qoldiring.

"OF": Eronda o'ynayotgan Evropa chempioni (1-son) 

Faxriddin Ro'ziev