Avvallari bu jamoalar o'rtasidagi uchrashuvga futbol jamoatchiligi va muxlislar bugungidek jiddiy etibor bermas edi. Biroq, ularning joriy mavsumda qayd etayotgan natijalari va ko'rsatayotgan o'yinlari bizga bu bellashuvga markaziy maqomini berishga majbur qildi. Ushbu bahsdan avval odatdagidek o'zbek futboli tarixidagi yorqin yulduzlardan, bugungi kunda turli lavozimlarda faoliyat olib borayotgan Timur Kapadze, Server Jeparov, Kamoliddin Murzoevning fikri bilan qiziqdik.
Timur Kapadze, (O'zbekiston yoshlar terma jamoasi bosh murabbiyi): - “Paxtakor”ni ham, AGMKni ham qanday kuchga ega ekanligini yaxshi bilamiz. Tarkib bo'yicha, o'yinni tashkil qilish borasida bir-biridan qolishmaydi. To'g'ri, bu o'yinda “Paxtakor” favorit. Lekin, AGMK o'tgan mavsumga qaraganda joriy yilda ancha mazmunli va barqaror o'yin ko'rsatmoqda deya olaman. Olmaliqliklar tarkibida har bir chiziqda yuqori saviyadagi futbolchilar bor. O'ylaymanki, ancha qiziqarli va murosasiz o'yin bo'ladi.
Server Jeparov, (O'zbekiston U 14 terma jamoasi bosh murabbiyi): - Qiziqarli o'yin bo'ladi. Ikki jamoa ham bugungi kunda ajoyib sport formasida. O'yinni to'g'ri yo'lga qo'yib olgan. AGMK himoyadan o'yin qiladi. Bu aniq. CHunki, ular safarda “Paxtakor”ga qarshi ochiq futbol qilmaslikni juda yaxshi tushunishadi. “Paxtakor” birinchi raqam ostida o'yinni quradi. Bahsni nazorat qiladi. AGMK esa qarshi hujumda o'z imkoniyatini kutadi va standart vaziyatlardan foydalanishga harakat qilib ko'radi. O'ylaymanki, bu o'yinni tomoshabinbop o'tishiga hech nima to'sqinlik qilmaydi.
Kamoliddin Murzoev, (AGMK jamoasi sobiq futbolchisi, O'zbekiston Proffessional futbolchilar uyushmasi rahbari): - “Paxtakor” har tomonlama favorit. Lekin, AGMK ham bu yil yaxshi o'ynayotganini unutmaslik lozim. Muxlislarbop chiroyli o'yin bo'ladi.
Bosh sahifaga
608