Mavsum boshidan beri hali g'alaba qozonmagan "Andijon" o'z maydonida "Surxon"ni qabul qiladi. Turnir jadvalida "Andijon" 5 ochko bilan 11-o'rinni egallab tkuribdi. To'plar nisbati 6-10. "Surxon" esa 4 ochko bilan 12-o'rinda boryapti va to'plar nisbati 8-17.
Demak, bugun Andijonda jadvalning ketma-ket pog'onalarida borayotgan ikki jamoa to'qnashuvi guvohi bo'lamiz. Qizig'i shundaki, "Andijon" bir pog'ona yuqorida turgani bilan hali g'alaba qozonmagan. Jamoa 8ta o'yinning 5tasida durang o'ynab, uch bor mag'lub bo'lgan.
"Surxon" esa bir martadan g'alaba va durang qayd etib qolgan bahslarda imkoniyatni boy berdi. Xususan termizliklar oxirgi to'rtta o'yindan beri faqat mag'lubiyatga uchrashmoqda. Jamoa o'tgan tur yangi murabbiy Ravshan Haydarov qo'l ostida ilk uchrashuvini o'tkazib "Loko"dan mag'lub bo'ldi, biroq "temiryo'lchilar"ga jiddiy qarshilik ko'rsata oldi.
"Andijon"ga kelsak, bu jamoa oxirgi 3ta o'yinini durang bilan yakunladi. "Burgutlar" safarda "So'g'diyona" va "Qizilqum" bilan 1:1, uyda esa "Bunyodkor"ga qarshi 0:0 hisobini qayd etishdi. Qizig'i shundaki, Andijon Jizzax va Navoiyda oxirgi daqiqalarda gol urib mag'lubiyatdan qutulib qoldi.
Bugun bahsda imkoniyatlarni teng baholasa bo'ladi. Lekin maydonda qattiq "jang" kechishi aniq, chunki g'alaba har ikki jamoaga nihoyatda zarur. Albatta, Ravshan Haydarov tezroq g'alaba qo'lga kiritilishini xohlaydi. Biroq yil boshidan beri hali yutmagan maydon egalari qarab turmasa kerak.
P.S. Bugun soat 19:00da boshlanadigan bahsni "Mahalla" telekanalida to'g'ridan to'g'ri kuzatib boring.
 Andijon | Superliga. 9-tur 12/07/2020, 19:00 - : - Boshlanmadi |  Surxon |
Bosh sahifaga
1159