Mazkur qiziqarli to'qnashuv oldidan mezbonlar sardori, tajribali futbolchi Samandar SHodmonovning fikrlari bilan qiziqdik.
- Samandar, joriy mavsumda "SHo'rtan" oldiga qanday vazifalar qo'yilgan?
-Jamoamiz oldiga PRO-Ligada chempionlikni qo'lga kiritgan xolda yana Superligaga qaytish vazifasi qo'yilgan. Navbatdagi uchrashuvlarda g'alaba qozonib, ushbu vazifani uddalashni maqsad qilganmiz.
- Futbolchilik faoliyatingizni yakunlaganingizdan so'ng, murabbiy bo'lishni maqsad qilganmisiz?
- Ochig'i hali ko'plab uchrashuvlarda maydonga tushib, "SHo'rtan" g'alabalariga o'z hissamni qo'shmoqchiman. Nasib bo'lsa kuni kelib futbol murabbiyi bo'lishni maqsad qilganman.
- Faoliyatingiz davomida turli Qashqadaryo klublarida o'ynagansiz. Sizningcha esda qolgan "derbi" qaysi o'yin bo'lgan?
- Ha to'g'ri, bugunga qadar Qashqadaryoning 3 ta klubida o'ynaganman. Bilasizmi, bu o'yinlarning hammasi ham qiziqarli bo'lgan, hech birini alohida ajratib ko'rsata olmayman. Barcha bellashuvlar zo'r bo'lgan.
- Bu yilgi mavsumdan "SHo'rtan"da yangi bosh murabbiy - Asror Aliqulov ish boshladi...
- Ha, klubimiz rahbariyati Asror Aliqulovning imkoniyatlariga ishongani xolda jamoa boshqaruvini topshirdi. Ayni vaqtda jamoamiz bosh murabbiyimizning ko'rsatmalari asosida ishlamoqda. Biz futbolchilar ham Asror Aliqulovni "SHo'rtan"ni Superligaga olib chiqishiga ishonamiz.
- Ertaga PRO-Liganing 3-turi doirasida Yaypanning "Turon" jamoasiga qarshi maydonga chiqadi. Bu o'yinga tayyorgarlik jarayoni qanday ketmoqda?
- Har bir uchrashuvda raqib kim bo'lishidan qatiy nazar faqat g'alaba uchun maydonga chiqamiz. "Turon"ga qarshi o'yinga ham murabbiylarimiz ko'rsatmalari asosida jiddiy tayyorgarlik olib bormoqdamiz. Bu turda xato qilmagan xolda g'alabaga erishib, jamoamiz muxlislarini xursand qilmoqchimiz. SHu o'rinda karantin vaqtida masofadan turib bizni qo'llab-quvvatlab turgan muxlislarimizga minnatdorchilik bildirmrqchiman. Barchangizga sog'liq va tinchlik-totuvlik tilayman!
Timur Ibragimov yozib oldi.
Bosh sahifaga
231