"Muhsin Muhammadiev bir haftadan buyon mehmonxonada yashamoqda, "Buxoro" bilan birga emas"

Ikki kun avval O'zPFL klublar bosh murabbiylari va rahbarlari bilan onlayn videokonferenciya o'tkazganida Muhammadiev unda ishtirok etdi. Bugun u biz bilan bog'lanib, bir haftadan buyon mehmonxonada ekani va jamoa bilan birga emasligi haqida aytib o'tdi. Uning fikriga ko'ra, Buxoro hokimligi vakillaridan biri (viloyat yoki shahar, aniqlik kirita olmadi) natijalar yaxshi emasligidan kelib chiqib, uning istefosini so'ragan (aslida bu uning vakolatiga kirish yoki kirmasligi alohida masala).

Yaqindagina Buxoro futbol klubiga rahbar tayinlash masalasiga yuzaki yondoshilgan, keyinroq O'zPFL bosh direktorni rasman ro'yxatdan o'tkazavermagach, masala qonuniy hal etilgandi. Endilikda bu masala kelib chiqyapti. O'zPFL klub qarorlarini hurmat qiladi va barcha masala qonuniy amalga oshishini nazorat qiladi. SHuningdek, eslatib o'tishimiz kerakki, murabbiylarni ishdan olish ham avvalgi yillardagidan butkul farq qiladi. 2020 yildan boshlab shartnomalarga murabbiyni belgilangan vaqtdan oldinroq istefoga chiqarmoqchi bo'lgan klublar unga kompensaciya to'lab berishi kabi band kiritilgan. Unga ko'ra, Muhsin Muhammadiev istefoga chiqsa ham, yil so'ngiga qadar maoshlarini to'liq olib turadi. Buxoro va murabbiy shunday kelishuvga erishgan.

Hammaga pul kerak bo'lgan davrda Buxoro futbol klubi rahbarlari ham Muhammadievga, ham yangi murabbiyga maosh to'lashlari kerak. O'sha Evropada ham biror murabbiyni istefoga chiqarmoqchi bo'lgan klub avval mana shu masalalarni obdon o'ylab, pishitib oladi. Biz ham shunga etib kelmoqdamiz", - deb yozadi Diyor Imomxo'jaev telegramdagi o'z kanalida.